Home arte y espectaculo Shortfilm “Pariba” lo tin su prome screening na Aruba 15 di Juni...

Shortfilm “Pariba” lo tin su prome screening na Aruba 15 di Juni na Cas di Cultura

64
0
SHARE
- Advertisement -

ORANJESTAD  (AAN):   E prome screening di e shortfilm “Pariba” lo ser estrena na Cas di Cultura dia 15 di juni 2019 den e sala di exposicion di 7or pm pa 10or pm. Lo tin 2 show, uno 7:30 y otro 8:30. Entrada ta gratis. Asina Elise Van der Linde, Co-Creator y Co-writer di “Shortfilm Pariba” a duna di conoce diamars mainta durante un  entrevista cu DIARIO.

‘Pariba’ ta e filmdebut di Aramis Garcia Gonzalez como director, y a wordo crea y skirbi conhuntamente cu Elise van der Linde, tur dos graduado di ‘Universiteit van Amsterdam’.

E film a wordo crea cu ayudo di UNOCA y di ‘Prins Bernhard Cultuurfonds Caribisch Gebied’ y cu un ‘crowdfunding’ intensivo.

Van der Linde a splica cu ‘Pariba’ ta e storia di dos amiga, Julie y Xiomara, cu ta celebra tur aña e Lighting Parade di Carnaval na San Nicolas. E aña aki nan ta pasa door di e mesun ritualnan e dia di e Parada, pero poco poco Julie ta cuminsa realisa cu lo ta e ultimo aña, paso Xiomara ta muda bay Hulanda pa sigui su estudionan. Nunca nan lo mira otro mas manera cu nan ta awor.

Elise Van der Linde a enfatiza cu pa medio di e film aki e creadornan kier ilumina e alumnonan cu ta bay studia den exterior despues di scol secundario y tambe nan sernan keri cu ta keda atras.

Un storia cu ta reconocibel pa hopi den islanan ABC, pero cu ta haya poco atencion na Hulanda y en general.

Tanto Aramis y  Elise a lucha cu e sentimiento di no sinti nan mes na cas, y esaki a inspira e creacion di “Pariba”, Elise a conta. E mes a experencia e situacion aki ora el a bay Hulanda y su amigonan mester a keda Aruba pa un aña mas.

“E topico aki ta habri e dialogo pa hende na Aruba y Hulanda over di con dificil e ta ora di bay Hulanda, unda bo tin mas oportunidadnan si pero ainda ta algo hopi dificil pa haci, anto ta algo cu no ta wordo papia ariba dje ainda”, Elise van der Linde a expresa.

Cu cooperacion di Arubianonan na Aruba y na Hulanda e film, completamente na Papiamento, a wordo crea.

Den e film ta participa: Regisor: Aramis Garcia Gonzalez, Escritor: Elise van der Linde y Aramis Garcia Gonzalez, Director di Fotografia: Fernando Barrientos, Casting: Jaydienne Loefstop y Gena Ramirez Boom, Musica: Efrem Angela y Edicion: Eva van Weeghel.

 

 

- Advertisement -

DUNA COMENTARIO

Please enter your comment!
Please enter your name here