Si Gobierno stop tur Mina di Santo e ora prijs di construccion di cas lo bira dobel

    524
    0
    SHARE
    - Advertisement -

    Companianan di excavacion ta boga pa pospone

    ORANJESTAD (AAN): Ta ora pa wanta cu e decision pa cera tur mina di santo na Aruba. Ta parce cu e impacto economico sin duda lo ta mas grandi cu e molester cu e industria aki ta causando awor na bisiñanan cerca di unda ta haci trabaonan di excavacion pa graniet y santo special pa traha bloki, pavers y otro productonan di concret.

    Diaranzon mainta a reuni cu Minister y departamentonan di Gobierno, den un esfuerso pa lanta un comision pa revisa e decision tuma pa cera tur mina. E peticion awor ta pa pospone e decision mientras ta analisa tur impacto, tanto di molester, economico y di trabao pa nos hendenan.

    E discusion tin bastante tempo caba andando, pero na maart ultimo, Gobierno a dicidi di laga cera tur mina di santo rond di nos isla. Ta di e tempo ey e companianan envolvi den maneho y excavacion di mina, cu ta rond di 30 compania, a protesta cerca Gobierno. Banda di esey otro companianan envolvi indirectamente, manera trucknan di Heavy Equipment, tambe a uni na e protesta, mirando cu si stop excavacion, lo nifica un paro den nan negoshi di transporte y entrega di santo tambe.

    Na tur awor ta 7 compania cu a haci un peticion na Gobierno pa un “aanlegvergunning”. Dicho peticion ta bou revision awor pa mira si Gobierno ta tuma nan den consideracion pa un permiso di operacion.

    E scenarionan awor ta como lo siguiente:

    • Gobierno ta duna algun permiso pa sigui coba mina pa haya santo local y promove mas desaroyo economico
    • Gobierno ta para tur excavacion y obliga tur hende pa cumpra santo for di exterior, cu consecuencia cu prijs di material di construccion por aumenta net dobel, pues 100% di aumento.

    Companianan ta evaluando pa importa santo for di Colombia, Venezuela of otro paisnan den region. Si tene cuenta cu e prijs di transporte acerca, e prijs cu companianan na Aruba lo cumpra e producto pa e ora bay traha bloki of pa uza pa yena fundeshinan di cas y edificio, lo aumenta drasticamente!

    Awor caba tin compania a cuminsa importa “Ytong” for di Hulanda, conoci como “gipsbeton” cu na final ta imposibel pa recicla. Esey ta haci cu aki 50 pa 60 aña cu basha e casnan abou, no por haci nada cu e material. Siendo cu den caso di concret por recicla y bolbe reuza.

    E companianan di excavacion of cu tin mina, ta uniendo den un solo organizacion. Den e dianan nos dilanti lo keda cla cu e permisonan necesario na Notario, pa asina cuminsa representa tur e companianan envolvi den e industria aki.

    Nan punto na Gobierno, pidi den un manifesto di maart 2019 tabata:

    1. Duna e companianan envolvi un periodo di transicion, manera Minister Otmar Oduber a anuncia durante un conferencia di prensa na februari 2019.
    2. Start un dialogo social di tur aspecto economico y social pa evalua consecuencianan.
    3. Lanta un comision cu representantenan di e companianan concerni pa busca un solucion faborabel pa tur partido.

    Pa awor e comision cu a reuni cu Minister Otmar Oduber awe no por duna mas informacion, pasobra lo mester presenta e puntonan discuti awe cu e miembronan prome. Lo informanan di e peticion cu nan a bolbe emiti na Gobierno y di e contesta cu Gobierno a duna riba peticion di e companianan concerni.

    Despues di esey, cu hopi placer, lo informa comunidad di e ultimo desaroyonan rond di posibel aumento barbaro di prijs di materialnan di construccion, si Gobierno para riba cu lo no permiti pa coba santo mas na Aruba mes.

     

    - Advertisement -

    DUNA COMENTARIO

    Please enter your comment!
    Please enter your name here