Studiantenan por cuminsa registra pa Good4theNeighborhood

    42
    0
    SHARE
    - Advertisement -

    Aruba Bank ta sigui desaroya habilidad di hobennan cu liderazgo

    ORANJESTAD (AAN): Durante un conferencia di prensa convoca Diamars atardi na oficina principal di Aruba Bank, e banco a introduci e proyecto di Good4theNeighborhood pa e aña aki.

    Esaki ta bira e di 10 aña cu e proyecto di Good4theNeighborhood ta wordo organiza. Despues di e exito di añanan anterior, den cual a  introduci e “Building Entrepreneurs concept”, e aña aki e tema lo ta un biaha mas Good4theNeighborhood (G4N) – Building Entrepreneurs 3.

    Nataly Simmons kende ta Executive Director di Aruba Bank, a splica cu “Building Entrepreneurs” ta bay riba e idea di pone empresarionan cuminza for di edad hoben. Nan kier stimula e hobennan pa bira empresario.

    E organizadornan di Good4theNeighborhood sa cu un negoshi chikito hopi biaha ta stimula economia di un pais, y a base di e programa aki nan por stimula hobennan pa bin cu ideanan nobo y inovativo di producto y servicio riba mercado.

    Good4theNeighborhood lo siña studiantenan con pa traha un ‘feasibility study’, un ‘business plan’, presupuesto, y mercadeo di e producto.  Nan ta haci yamada riba hobennan di 13 te cu 17 aña cu tin nada di haci den vakantie, y cu kier siña mas con pa crea nan mesun negoshi, e ora por registra pa e proyecto aki.

    Roxanne Croes di Aruba Bank a splica cu nan lo por tuma maximo 50 studiante pa participa na e programa di 3 siman aki durante vakantie grandi.

    Aruba Bank ta duna hobennan un chens pa siña via expertonan local, con nan por habri nan mesun negoshi, siña e habilidad y principio basico di negoshi cual nan por usa den nan bida.

    Studiantenan ta bin cu idea pa un producto, y asina ta haya feed-back di e huradonan.  Asina nan por realiza e producto, como cu nan ta haya un budget.  Di e forma ey por crea productonan zuiver.  Roxanne a enfatiza cu pa 2019 nan lo kier mira ideanan nobo.

    Good4theNeighborhood ta algo educativo, pero alavez ta un competencia.  E programa lo cuminsa dia 8 di Juli y termina dia 27 di Juli proximo. Studiantenan cu por participa ta di scolnan secundario, entre 13 pa 17 aña di edad. Registracion ta individual, pero eventualmente lo forma grupo di 5 studiante. Esunnan cu registra no por registra nan mesun grupo.

    E studiantenan ta bini hunto den vakantie pa siña riba entrepreneurship den e Good4theNieghborhood headquarters na  Aruba Bank Camacuri. Pa 3 siman largo nan lo ricibi trainingnan den oranan di mainta y mester traha riba nan asignacion. Lo bay tin varios “docente” pasando riba diferente topico. ‘Cada ekipo lo ricibi un budget pa nan lo traha cu ne y asina realisa nan producto cu nan a presenta ‘, Roxanne Croes Marketing Officer di Aruba Bank ta informa.

    Ramsis Arends a splica cu e obhetivo primario di G4N desde cu a lansa esaki na 2010 ta, pa mustra cu Aruba Bank ta e banco cu ta tin e bienestar di nos comunidad central. Tambe pa ta e proyecto mas grandi di e comunidad di studiantenan di Aruba, pa nan por desaroya nan habilidad di leadership, trabao den ekipo y termina e proyecto na ora y den e presupuesto aloca.

    “E obhetivo general di G4N 2019 ta pa entrepreneurship yuda e hobennan desaroya nan autoestima y un mentalidad nobo cu por impulsa nan riba e caminda di exito” Nataly Simmons, Executive Director di Aruba Bank ta afirma.

    A move e proyecto cu tabata basa riba scol y a cambi’e pa individual. E exigencia ta cu nan mester ta studiante di scol secundario pa participa, pero nan no mester inscribi como  scol.

    - Advertisement -

    DUNA COMENTARIO

    Please enter your comment!
    Please enter your name here