Home Hudicial Un aña di prison pa homber cu a atraca homber drentando su...

Un aña di prison pa homber cu a atraca homber drentando su auto

55
0
SHARE
- Advertisement -

Hues a duna e sospechoso un chens pa e drecha su bida

ORANJESTAD (AAN): E homber M.D.G. a scucha Hues bisa cu e ta hay’e culpable di a haci atraco. Aunke cu M.D.G. ta para riba cu e no a haci e atraco, Fiscal a mustra cu tin imagen di video di seguridad caminda Polis a reconoce M.D.G. El a worde condena na 1 aña y 6 luna di prison di cual 6 luna ta condicional cu un tempo di prueba di 2 aña.

E acusacionnan cu Fiscal a presenta den Corte contra M.D.G. ta cu el a haci un atraco riba 12 Februari 2019. Tambe e ta worde acusa di destruccion di un bentana riba 1 Januari 2019.

Hues a bisa cu un hende a mira M.D.G. tira piedra kibra glas. M.D.G. ta admiti esaki tambe.

   ATRACO CU VIOLENCIA:

Hues a mustra cu un homber a declara na Polis cu el a sali for di supermercado y ora el a bay pa drenta auto, un hende a gar’e duro na su garganta y ranca su cadena di oro y core bay cun’e riba un bicicleta. Riba camera di seguridad di e supermercado a mira cu ta M.D.G.

Polis a bay e supermercado y a reconoce M.D.G. riba camera di seguridad. M.D.G. ta para riba cu e no a haci atraco. El a bisa cu berdad el a bay Chines pa cumpra cos y despues a bay. El a bisa cu e tabata riba su bicicleta. Hues a bisa con por ta cu e homber ta bisa cu el a mira M.D.G. bon y riba camera di seguridad el a reconoce M.D.G.

Ta asina cu M.D.G. ta keda para riba cu el a cumpra cos y bay y no a haci atraco. Hues a bisa cu hende a scucha e homber ta grita y ta M.D.G. tabata riba bicicleta. M.D.G. a bisa Hues cu e tin trabao y no ta bay horta cadena di oro. Hues a mustra cu M.D.G. tin algun caso di ladronicia y menaza. Na 2015 tabata ultimo biaha cu el a worde castiga y despues di 4 aña e ta presenta atrobe dilanti Hues den Corte.

   FISCAL:

Fiscal a bisa Hues cu a keda legalmente proba cu M.D.G. a kibra e bentana. Tambe e ta haya legalmente proba cu M.D.G. a haci atraco riba e homber y a ranca e cadena di oro y core bay riba bicicleta. Na opinion di Fiscal, tin testigo a mira con e atraco cu violencia a sosode. E doño di e supermercado tambe a scucha gritamento. Tin hende a mira M.D.G. haci compras den e supermercado. A mira riba camera un persona ta core bay riba bicicleta y ta M.D.G. tabatin bicicleta.

Fiscal a bisa Hues cu ta masha fastioso cu M.D.G. ta kibra bentana di un cas. Atraco ta un caso hopi serio. Esaki a sosode den dia cla. Apesar cu M.D.G. ta nenga, Fiscal ta haya cu M.D.G. ta culpable. Pa cu e castigo, el a bisa cu e ta tene cuenta cu M.D.G. ta hoben. Fiscal a bisa cu el a pensa den castigo combina pa asina presiona M.D.G. stop. Fiscal a exigi 18 luna di prison, di cual 6 luna ta condicional cu un tempo di pruba di 2 aña.

   ABOGADO:

Mr. Heinze a bisa Hues cu M.D.G. ta para riba cu e no a haci e atraco. El a cuestiona e hecho cu ta ser papia cu e atraco a sosode 3’or di atardi pero riba video ta mira cu esaki a sosode 4’or.

El a bisa cu riba e video por mira cu tabatin un luchamento pero M.D.G. no tin e postura di un persona cu ta bay lucha cu un hende. El a bisa Hues cu M.D.G. tin un bon trabao na hotel y tin un relacion serio cu un dama. E no ta kere cu M.D.G. ta bay haci e atraco.

Abogado a mustra cu M.D.G. tabatin un jeans bisti siendo cu segun hendenan, e atracador tabatin carson cortico. Segun e abogado, hende conoce M.D.G. como un persona hopi trankil y no por imagina cu e ta bay actua asina agresivo. E abogado ta haya cu aki tin duda si realmente ta M.D.G. a haci e atraco.

   SENTENCIA:

Hues a bisa cu e ta sera tratamento di e caso y ta dicta sentencia di biaha. Hues ta haya legalmente proba cu M.D.G. a kibra e glas di bentana y e atraco cu violencia. Hues a mustra cu e victima a bisa cu ora e kier a drenta su auto, un homber cu flanel blanco a lucha cun’e y ranca su cadena y bay cun’e. Un testigo a bisa cu el a tende gritamento y a mira e homber cu a haci compras a ranca e candena y core bay riba bicicleta. Hues a bisa cu atraco ta un caso hopi serio y ta causa inseguridad. Pa atraco riba caya Hof ta duna 2 aña di prison. El a mustra cu den pasado como mucha M.D.G. tabata horta. Teniendo tur cos na cuenta, Hues a bisa cu e lo duna M.D.G. un chens y ta confirma exigencia di Fiscal. Hues a condena M.D.G. na 18 luna di prison di cual 6 luna ta condicional cu un tempo di prueba di 2 aña. Esey ta nifica cu M.D.G. tin 1 aña di prison pa sinta y si e comporta su mes, e por sali mas tempran for di KIA.

- Advertisement -

DUNA COMENTARIO

Please enter your comment!
Please enter your name here