Home General 10 di juni 2016 – 18 di juli 2019: e veredicto di...

10 di juni 2016 – 18 di juli 2019: e veredicto di berdad

125
0
SHARE
- Advertisement -

Despues di tres aña Aruba ta den agonia nacional 

*Awe gasolin pa bay trabou ta depende di desenlace Citgo

*E unico siguransa di Citgo ta investigacion hudicial criminal 

ORANJESTAD(AAN)–10 di juni 2016 ta un fecha historico pa Aruba. Tur medio di comunicacion, organisacionnan sindical, pueblo henter tabata baila mientras informacion tabata drenta cu Ministro Presidente Mike Eman a firma documentonan cu a mara Aruba na Presidente Nicolas Maduro.

Aruba a wordo informa cu futuro a wordo salba pa medio di cinco acuerdo cu te na e momento Parlamento di Aruba no a haya oportunidad pa studia y asina duna nan mandato oficial na Gobierno Mike Eman pa yega na acuerdo cu Nicolas Maduro.

Tres aña despues cu Gobierno Mike Eman a firma e acuerdo, cu no a permiti oposicion di Parlamento studia manera ley ta exigi, Aruba ta lucha pa sobrevivi un crisis economico den un crisis mundial den cual Venezuela y Citgo ta central.

Na e momento aki Aruba ta depende completamente di e crisis na Venezuela pa haya gasolin pa autonan core. Combustibel pa avionnan subi y baha y pa barconan por nabega. 

Bida diario di Arubianonan

afecta pa un acuerdo ilegal 

E documentonan cu tabata mishi cu bida diario di Aruba, nunca a wordo someti na Parlamento pa manera ley ta exigi, Gobierno Mike Eman a haya autorisacion di Parlamento prome cu el a mara Aruba na loke a bira desgracia di Aruba.

Diferente compania nobo a wordo introduci na Aruba sin participacion, discusion, investigacion di Parlamento di Aruba cu a wordo trata na mes forma cu Nicolas Maduro tabata trata su oponentenan na Venezuela.

Nan a pasa contra reglamento di ley y por wordo considera ilegal dor di Aruba cu si a wordo mara na Nicolas Maduro.

Gobierno Mike Eman a haci pueblo kere cu Nicolas Maduro no por a mete den asuntonan di Citgo Aruba, cu nan a yama e “bon Citgo”.

Nelson Martinez tabata e nomber di e gerente di Citgo Petroleum Company, cu na 2016 ya tabata den problema financiero grandi y tabata wordo investiga dor di Husticia Mericano.

Ya na 2015 tabata tin casonan criminal bou investigacion di Departamento di Husticia di Merca, cu tabata alerta a base di un rapport di Asamblea Nacional di Venezuela cu a denuncia con pa medio di Citgo placa di Venezuela tabata disparce.

Na 2016 no tabata tin

cifra positivo di Citgo

Husticia di Merca tabata tin lista di personanan directamente relata na Citgo den investigacionnan criminal den cual ya tabata tin hende cu a admiti nan culpa.

Stabilidad hamas Citgo por a trece pa Aruba pasobra destino di Citgo mes tabata un  pregunta grandi.

E situacion financiero di Citgo semper tabata den scuridad y tabata conoci na 2016 cu regimen Maduro tabata sconde e situacion financiero di Citgo, cu tabata haci debe grandi y tabata manda cantidad di placa Venezuela via diferente ruta cu awe ta bou investigacion.

Mientras Aruba tabata baila, Nicolas Maduro a duna Rusia y un grupo di financiado Mericano tur poder financiero di Citgo. El a hipoteca e compania loke ta nifica cu Citgo realmente ta den man di Rosneft di Rusia y e financiadonan Mericano.

Awe no por tin ningun siguridad ni certidumbre pa loke ta trata Citgo. E bom cu gobierno Mike Eman a pone bou economia di Aruba a rementa.

Medida Mericano a scapa

Aruba di Centro Chavista

y socialista 

Na 2017 Nicolas Maduro a detene e cabesantenan di Citgo pasobra nan lo a trata na atrae un grupo di financiado pa Nicolas Maduro pa e debe Venezolano cu Citgo como borg. Nicolas Maduro tabata kier otro grupo y a tira Nelson Martinez y e ehecutivonan Mericano den prizon.

Na 2017 el a pone Asdrubal Chavez na cabes di Citgo na Merca, pero Merca a core cu Chavez cu a perde su Visa pa drenta Merca como parti di medidanan cu Merca a tuma contra Nicolas Maduro den e crisis cu a surgi na Venezuela.

Chavez a trata di sigui cu e plannan pa Aruba bira e sede nobo di regimen Maduro y socialismo.

Medidanan di Merca a cera porta pa Chavismo lo a haya un baluarte na Aruba y pregunta grandi lo ta kico lo a pasa na Aruba si den e problemanan internacional, fronteranan entre Venezuela y Aruba a wordo cera pa evita resultadonan serio pa siguridad nacional.

Aruba ya ta parti di e investigacionnan internacional cu mester determina con y cuanto placa a pasa Aruba.

Aruba no mester tin ningun speransa den Citgo. Na e momentonan aki den Corte tin bringamento pa Citgo y pa placa di Citgo.

Aruba mester ta den incertidumbre. Aruba a wordo hinca den un situacion nunca bisto. Manera DIARIO a adverti, Aruba a wordo hinca den un crisis mundial. 

- Advertisement -

DUNA COMENTARIO

Please enter your comment!
Please enter your name here