Hues a dicta sentencia
ORANJESTAD (AAN) – Manera DIARIO a publica, ayera mainta Hues a dicta sentencia den e caso penal cu Ministerio Puiblico a cuminsa contra Ryson Paskel. Ta asina cu Hues a baha e castigo exigo pa Fiscal.
CULPABEL DI A HINCA MATA
Den sala di Corte tabata presente familiarnan di e victima Camilo Carreño Sosa. Hues a bisa cu e ta haya legalmente proba cu Ryson a hinca mata Camilo Carreño Sosa (22) riba e parkinglot patras di Sand Bar. Tambe Hues ta haya Ryson culpable di a maltrata y menaza un persona y tambe cu el a horta for di Brandweer.
Hues a bisa cu Ryson a hinca e victima cu un cuchiu di 15 cm largo den curazon y e victima a muri di biaha.
NO KERE PASKEL
Hues a mustra cu Paskel a bisa cu el a hinca pasobra e victima a atake cu un habridor di boter di biña. Hues a bisa cu tabatin un pelea entre Paskel y e victima caminda amigonan di e victima tambe a bringa contra Paskel. Despues Paskel a bay y a bolbe y a pasa man pa un cuchiu. Hues a mustra cu Paskel a bisa cu Camilo tabatin un habridor di boter y a bay riba dje. Hues a remarca cu e no ta kere e declaracion ey. El a bisa cu riba camera di seguridad por a mira cu ta Paskel a core bay riba e victima Camilo y a hink’e cu e cuchiu den curazon.
CASTIGO
Pa cu e castigo, Hues a bisa cu e ta tene cuenta cu ta riba caminda public, dilanti amigonan, Paskel a hinca mata e victima. Hues a bisa cu Paskel a kita bida di e victima y a causa perdida grandi pa e famia. E hecho aki a causa intrankilidad den comunidad.
Hues a bisa cu e ta tuma Paskel na malo cu a bay sconde pa Polis. Esaki a causa hopi intrankilidad pa famia di e victima. Mester a haci esfuerzo grandi pa haya Paskel. Na opinion di Hues, esaki ta mustra cu Paskel no kier a para responsabel pa loke el a haci.
Hues a sigui bisa cu e ta tene cuenta cu e raport psycologo y Reclasering. Hues a condena Paskel na 11 aña di prison. E famia tabata murmura ora Hues a bisa e castigo. Pa loke ta e daño material, Hues a calcula esaki na 23 mil florin y a pone medida di pago. El a declara no admisibel e demanda di e victima di maltrato.
