Home General Alerta pa supuesto ehercicio militar di Maduro

Alerta pa supuesto ehercicio militar di Maduro

118
0
SHARE
- Advertisement -

Regimen Maduro ta den un caya sin salida y ta peligroso

*No tin ningun siguransa cu Guaidó lo ta ganado di un eleccion

*Aruba mester mantene maximo siguridad den situacion actual 

ORANJESTAD(AAN)–E hecho cu Ministro Presidente Evelyn Wever- Croes a declara cu e frontera cu Venezuela ta keda cera, a haya reaccion den prensa local y internacional. E actitud di Wever-Croes ta demostra e actitud mas responsabel di e pais na e momentonan aki, cu mester pone siguridad nacional dilanti tur otro aspecto.  DIARIO a discuti e situacion actual cu informantenan  experto riba nan tereno.  E region Caribense y di Sur America mester keda den estado di alerta, pasobra awe e situacion a bira hasta mas peligroso.

No tin ningun garantia den e situacion actual Venezolano. Despues cu hasta Nacionnan Uni finalmente mester a acepta casonan serio contra derecho humano na e pais, no ta mira cambio den e actitud di regimen Maduro, cu a drenta un caya sin salida y segun informantenan ta mas peligroso cu nunca.

“Regimen Maduro no tin nada mas di perde. Tur hende ta papia di Merca, pero mayoria di pais liber a cera porta pa e gobierno y su circulo mas cercano. Tin cantidad di casonan den Corte rond mundo contra nan y hasta e Corte Internacional di Husticia a wordo acerca,” informantenan a splica.

Algo cu tur cuerpo di siguridad den e region y mundo liber ta tene na cuenta ta, Maduro a anuncia un ehercicio militar na su fronteranan fin di e luna aki. Kico esaki ta encera, no ta conoci.

Medidanan di halto siguridad a wordo tuma na tur pais y no por permiti pa espacio wordo duna na mas miembro di e regimen peligroso pa drenta paisnan den region.

Ta wordo calcula cu ya prome cu e situacion na Venezuela a bira explosivo, regimen Maduro a sigura cu e tin su hendenan tur caminda.

“Ministro Presidente Wever-Croes a haci loke ta corecto y loke tur pais ta haci na e momento aki. Merca a duna prueba cu e no ta coregi su situacion sin mas. Nan no tin garantia cu Guaidó lo bira dirigente di Venezuela. Pa Guaidó bira Presidente directamente eligi, e mester gana eleccion. Te awor e deliberacionnan pa eleccion ta sin resultado y mester duda cu nan lo tin resultado. si bini eleccion nobo, ainda no tin siguransa cu ta Guaidó ta sali ganado y no dirigente di cualkier otro partido existente of cu hasta por ta naci den e grupo di Maduro mes,” informantenan a bisa.

Por comprende cu na e momentonan aki, paisnan den region ta mantene estado di maximo alerta.

“No mester exclui cu den e refugiadonan tambe tin representante di Maduro,” a wordo treci dilanti.

Informantenan a bisa DIARIO cu na e momentonan aki bienestar y siguridad di Aruba ta primordial y cu no por tuma ningun riesgo cu un regimen sumamente peligroso cu a demostra di no ta respeta ni hende ni bida.

- Advertisement -

DUNA COMENTARIO

Please enter your comment!
Please enter your name here