Home Editorial Aruba lo ta e gran perdedo di un conflicto politico orkesta

Aruba lo ta e gran perdedo di un conflicto politico orkesta

288
0
SHARE
- Advertisement -

Editorial

Pa basta dia, DIARIO ta analisa y discuti cu expertonan e situacion cu ta desaroya na Aruba.  Por nota atrobe un coriente pa causa conmocion politico na un momento sumamente importante pa Aruba, cu a drenta e temporada di aña cu generalmente ta afecta su entradanan.

Na e momentonan aki, turbulencia politico di cualkier skina y produci directamente pa partidonan politico of nan fanaticada, lo tin problemanan desastroso pa e pais, cu no tin partidonan politico como nan fuente di entrada. Aruba pa su bienestar economico y financiero ta depende na prome luga di e pilar di su economia, cu ta comercio cu mester genera fondonan pa e pais tin entrada.

Na e momentonan aki mester mira bon con politica a wordo hunga cu e aparato gubernamental.

Ayera na un forma categorico a base di informacionnan clave cu nos a ricibi, nos a mustra Aruba riba e rumbo cu ta hiba Aruba y e afan pa destabilisa e pais pa asina por logra eleccionnan nobo.

Pa por comprende loke ta pasa awe, nos mester kita e bril scur cu kier bisti pueblo cu na 2017 a duna muestra cu e sa kico a pasa cu su pais.

E loke ta pasa Aruba awe ta herencia di loke gobierno anterior a laga atras. Pakico Aruba no tin placa? Kico a pasa cu entrada di Aruba y kico a stroba Aruba traha for di 2015 ora a bira evidente cu situacion di e pais tabata serio, pa crea un futuro sostenibel y duradero?

Hecho proba y documenta ta demostra con gobierno anterior a hiba un maneho cu a destrui e base financiero di Aruba. Rapportnan oficial ta duna prueba y documentacion di e forma cu a destrui e siguridad financiero di Aruba mientras tabata haci e pais kere cu ta rescata ta rescata su bienestar.

Gobierno anterior a actua contrario na reglanan di un bon maneho pa gobierno y empresa priva y a baha entrada di e pais, a bini cu prestamonan enorme, a introduci proyectonan incontrolabel di PPS cu a guli Un Biyon di e pais, a firma un acuerdo di halto riesgo cu Citgo di Nicolas Maduro y a crea un debe nacional monstruoso cu awe Aruba mester paga cu interes.

Aruba awe mester wordo destrui for di forsa politico scondi?

DIARIO manera semper ta e caso, a descubri e plannan scondi y ayera a mustra Aruba riba e direccion cu Aruba ta bay. Con nos por confronta eleccionnan nobo na e momentonan aki?

Aruba tin placa pa paga pa ahusta sueldonan di tur ambtenaar mientras e baca di lechi di Aruba, cu ta comercio, no tin placa pa cumpli cu su trahadonan?

Awe Aruba ta pidi su ciudadanonan pa sano huicio prevalece y no interes di ningun grupo individual. Awe gobierno, oposicion, comercio, sindicato y tur ciudadano mester tene bienestar di Aruba nos dilanti.

Nos a demostra awe atrobe, cu nos por duna Aruba e guia y adverti pa problema grandi.

Nos ta kere den Aruba  y e pueblo di Aruba cu awe mester uni pa yega na solucion pa nos pais.

Nos lo sigui guia Aruba y nos fe ta grandi cu Todopoderoso lo yuda Aruba alcansa un futuro nobo di bienestar, paz y trankilidad. Pa esaki cristalisa nos mester haci husticia cu nos pais. 

- Advertisement -

DUNA COMENTARIO

Please enter your comment!
Please enter your name here