Director di Serlimar: combersacionnan ta sigui pa loke ta e incinerator
ORANJESTAD (AAN): Mirando cu ainda no a logra e yega na un incinerator, Hendy Davelaar, director di Serlimar a declara cu aworaki tin diferente scenario ariba mesa. No ta e so ta forma parti di e Task Force y e no por vocifera esaki.
A señala cu pa aworaki por tin un trankilidad pasobra tin un manera responsabel pa controla e procesamento di e desperdicio.
Serlimar tambe ta hibando un maneho pa preveni candela un biaha mas na Parkietenbos. Tambe tin pendiente pa sinta cu Cuerpo di Bombero na mesa pa wak den cierto casonan kico por haci.
E fenomeno di hende cu ta subi di manera ilegal ariba e tereno di dump a baha considerabelmente. Tabata algo cu a lanta cabez un temporada y a reforza e parti di seguridad. Pero ya caba e asunto aki a baha basta.
Naturalmente ta un tereno grandi cu no por cere completo, pero cu e personal di seguridad tin un control riguroso ta tumando lugar, a indica.
Pero Serlimar di nan parti ta zorg pa tur atardi, loke a wordo hiba e dia ey, wordo tapa pa asina minimaliza e chens pa tin cualkier eventualidad, Davelaar a remarca.
A sigui bisa cu mirando cu no a logra den e prome fase pa haya un incinerator ainda no a yega na un decision final.
Diabierna ultimo a sinta cu e Task Force hunto cu Minister Oduber. Aworaki e combersacion y deliberacionnan ta andando pa loke ta e parti ey. Mientrastanto esey no ta kita cu nan ta sigui controla hopi skerpi e manera con nan ta procesando loke ta haya aworaki, e expresa.
