Home General Bala pa Polis: sensacion politico y responsabilidad pa e pais

Bala pa Polis: sensacion politico y responsabilidad pa e pais

58
0
SHARE
- Advertisement -

Analisis

Tabata tin un tempo cu personanan cu ta miembro di Cuerpo di Polis, no tabata permiti pa participa na politica activo. Nan por a vota pero tabata tin prohibicion pa demostra publicamente cu nan ta parti di un of otro organisacion politico.

Di e forma aki den pasado tabata garantisa cu e cuerpo cu directamente ta encarga cu e siguridad interior di e pais y cu ta persigui loke ta contra ley, no tin laso directo cu politica.

Polis ta parti di e aparato hudicial cu ta percura directamente pa e bienestar di e ciudadano y temanan cu ta mishi cu e aparato hudicial, mester duna e ciudadano e sentido di trankilidad. Na momento cu e cuerpo por wordo uza directamente of indirectamente pa fomenta sensacion politico, duna advertencia na criminalnan na forma dirigi of inconsciente of pa crea panico den pueblo, tin algo completamente robes y contra e ley cu ta regla existencia di polis.

Tin asuntonan di polis cu mester keda interno y tin forma pa tene nan interno. E Cuerpo di Polis ta cay bou di e Minister di Husticia pero den ehecucion di su trabou, e agente policial no ta dependiente di e Minister di Husticia.

E agente policial ta directamente mara na e trabou di fiscal den e sentido cu e ta assistent di e Fiscal y tin e nomber di Hulpofficier van Justitie.

Un Polis ta tuma tur informacion pa persecucion di violacion di ley. E ta ricibi keho, e por parti boet. E tin arma pa e defende e ciudadano y e pais. E tin derecho riba tur informacion, cu segun su compilacion tambe ta dicidi con un caso lo desaroya dilanti Hues.

Un agente di polis ta evita cu cualkier señal ta wordo duna na baho mundo cu por perhudica e firmesa di e pais contra criminalidad.

No tin luga pa wega politico den Cuerpo di Polis. Ni Ministro, ni Parlamentario, ni Fiscal, ni e Polis mes mester crea sensacion politico cu ta causa susto cerca e poblacion.

Loke cu a pasa cu e asunto di bala pa Cuerpo di Polis, ta afecta Aruba manera tur hende cu tin un crenchi di conocemento di responsabilidad di polis, mester sa. For di dos aña pasa lo tabata tin un problema cu bala di Polis.

Esaki no ta un asunto pa sindicato regla. Si agentenan policial a papia riba e materia cu nan coleganan di sindicato di polis, e caminda pa a haya informacion tabata Fiscal bou cual nan ta resorta. Mescos cu un caso di Fiscal por keda pega den Corte pa motibo di e rapport di polis, mescos un fiscal mester por splica Cuerpo di Polis pakico no tin bala pa e haci su trabou y percura pa tuma e motibo necesario.

Ningun momento mundo criminal mester a haya un indicacion cu no tin bala y cu mester manda busca for di Boneiro.

Si e forma cu despues di dos aña e asunto a sali den publicidad ya ta robes, e wega politico no ta duna muestra di politica di integridad ya cu ta mishi cu bienestar di e pais y e pueblo.

Un miembro di Parlamento por a papia cu e Minister of e Fiscal pa trece claridad pa Cuerpo di Polis.

Ta bon cu e Minister por a splica cu e situacion ta wordo soluciona. Pero awor mester splica den sala di Parlamento pakico mester a atende cu e asunto aki na e forma aki y kibra bienestar di Aruba pa hunga wega politico.

Aruba no por laga wega politico sigui zink su structura legal.

- Advertisement -

DUNA COMENTARIO

Please enter your comment!
Please enter your name here