Home Editorial Ban rescata loke mundo a admira di Aruba

Ban rescata loke mundo a admira di Aruba

55
0
SHARE
- Advertisement -

Editorial

Durante e siman cu a termina, nos pensamento mester a bolbe na e momentonan historico di Aruba. Na Hulanda, Parlamento tabata debati cu otro Parlamentonan di Reino riba asuntonan cu pa Aruba mester wordo considera delicado. Na Aruba mes, problema tabata wordo genera pa e pais cu mester sali for di crisis.

Pa por informa Aruba debidamente, nos mester a bay mas leu cu e loke ta wordo pinta y compara Aruba di awe cu e Aruba cu mundo ta admira y mundo ta respeta.

Semper tabata tin un linea cu ta distingui Aruba for di tur otro pais y hasta a crea den Reino un respet enorme pa Aruba.

E respet aki a culmina durante e siman di 7 pa 12 di maart 1983 na Hulanda. E lucha pa Status Aparte di Aruba a yega na un punto maximo y na Mesa Rondo e destino di Aruba mester a wordo defini.

Un grupo chikito di Arubiano a distancia nan mes di e liderazgo di Betico Croes, pero e gran mayoria di Aruba tabata un solo bos y curason pa realisacion di e anhelo grandi di e pais.

E momento tabata historico pasobra no solamente tabata bay atende kico lo pasa cu e futuro estatal di Aruba finalmente, pero mas ainda pasobra Reino y mundo mester a acepta e forsa grandi di union Arubano a sali dilanti y a bira aceptacion di e exigencia pa Status Aparte di Aruba.

Den Reino y den exterior semper ta existi un miedo pa ataca Aruba of Arubianonan pa un simpel motibo. E Arubiano no ta permiti ningun hende mishi cu su balornan, cu su identidad, cu su cultura, cu tur loke ta e Aruba cu un generacion tras otro a hereda.

Arubianonan ta bringa den cas pero den bista di mundo ta un Aruba tin. Un pueblo di Aruba cu ta busca solucion pa su problemanan y no ta saca pia pa otro Arubiano cay.

Hamas e Arubiano lo bay contra bienestar of nomber di Aruba y hamas e Arubiano lo hunga cu e bon nomber di Aruba.

Aruba nunca a soña cu e lo pasa den e crisis cu a wordo forma durante e ultimo dies añanan a base di un maneho cu a gasta placa cu no tin, a bay pone economia di Aruba den man di fracaso sigura, a crea debe cu hamas un negociante lo crea pa su compania.

E siman aki atrobe Aruba como parti di Reino a atende asuntonan cardinal. E parti di supervision hancra den Laft, lo mester warda te despues di vacacion.

Aruba awor mester atende loke ta pasa na cas. Den e siman venidero Aruba mester uni atrobe. Aruba mester bira atrobe e forsa di union Arubano pa sigui cana dilanti.

Nos mester rescata loke mundo semper a aplaudi di Aruba, e Aruba legitimo y no e Aruba cu kier crea cu artefactonan importa cu ta destrui nos identidad.

Aruba ta Aruba, un pais respeta y asina e mester keda pa semper. Arubianismo mester carga Aruba pa cu fe, nos yega alcansa metanan nacional.

Aruba ta nos ideal, Aruba ta nos motibo di lucha. E Aruba cu cual nos a nace den nos curason y ta nos herencia mas grandi.

Ayera nos a lucha pa kibra cadena estatal. Awe nos ta lucha pa kibra cadena di crisis financiero y economico. Aruba lo logra mientras Aruba ta Aruba. Un feliz fin di siman pa hunto nos drenta un siman di solucion y bendicion.

- Advertisement -

DUNA COMENTARIO

Please enter your comment!
Please enter your name here