Home Economia Banco Central ta adverti cu confianza di consumidor ta sigui deteriora

Banco Central ta adverti cu confianza di consumidor ta sigui deteriora

26
0
SHARE
- Advertisement -

ORANJESTAD (AAN): E sentimento di consumidor a sigui deteriora den e di dos trimester di 2019, segun e ultimo resultadonan di e Encuesta di Confianza di Consumidor (CCS)  di Banco Central di Aruba. E Indice di Confianza di Consumidor a cai te na 95,1, for di 95,8 e trimester anterior, indicando sentimentonan relativamente mas pesimista.

E prome componente, esta e Indice di e Situacion Actual a empeora den e di dos trimester di 2019, bahando cu 0,6 punto di indice te na 94,0. Esaki a worde causa pa e indice di situacion personal financiero actual cu a bira mas pesimista den e di dos trimester di 2019, esta di 97,5 pa 96,6 y e indice di situacion financiero gobierno actual cu a baha cu 1,3 punto di indice, esta di 96,7 pa 95,4. E indice di condicionan negoshi y economico actual a keda na 91,8. E indice di situacion laboral actual a mehora cu 0,1 punto di indice, esta di 92,2 pa  92,3.

E di dos componente, esta e Indice di Expectativanan ta esun cu a deteriora mas den e trimester bou di revision, bahando cu 1,5 punto di indice te na 95,8. Consumidornan tabatin expectativanan menos positivo ariba nan situacion personal financiero, como cu e indice aki a bira pesimista, di 101,2 pa 98,4 (un menoria di 21,8% di respondientenan a indica cu nan situacion financiero lo ta mihor den e siguiente 6 luna, un rebaho compara cu 31,3% di e trimester anterior).

E indice di expectativanan condicionan negoshi y economico a bira mas negativo, esta di 96,0 pa 94,5. E indice di expectativanan posicion financiero gobierno tambe a deteriora, esta di 99,0 pa 97,0. Solamente e indice di expectativanan laboral a mehora cu 0,3 punto di indice.

E di tres componente, esta e Indice di Habito di Consumo a baha durante e di dos trimester di 2019 cu 0,3 punto di indice te na 96,4. Consumidornan tabata negativo riba compra di auto, bay cu vakantie, haci un prestamo, y haci un hipoteca, pero tabata positivo riba compra di aparato grandi. E indice pa bay cu vakantie a bira negativo durante e trimester bou di revision, esta di 101,0 pa 99,6.

E gran mayoria di respondientenan (87,5%) ta anticipa cu prijsnan lo subi den e siguiente 6 luna, resultando den un Indice di Expectativanan di Prijs di 90,6.

Resumiendo, e deterioracion den e confianza di consumidor ta atribui na bahadanan den casi tur  componente.

- Advertisement -

DUNA COMENTARIO

Please enter your comment!
Please enter your name here