Home General Citgo e arma mas poderoso di Rusia den conflicto actual

Citgo e arma mas poderoso di Rusia den conflicto actual

117
0
SHARE
- Advertisement -

Ni base militar ta mas importante cu poder regla na 2016

*Ni Guaidó ni Merca por mishi cu posicion strategico Ruso

*Financiadonan Mericano unico adversario contra Rosneft

ORANJESTAD(AAN)– Den e conflicto Venezolano, bista di mundo ta fiha riba e parti militar. Aruba como parti di region di Caribe cu atencion a sigui tur noticia riba base militar y presencia Ruso na Venezuela. Mientrastanto na Aruba parti di e arma mas poderoso di Rusia ta localisa. Informantenan di DIARIO for di 2018 a adverti cu Aruba lo ta parti di e escenario di un crisis mundial debi na e presencia di Citgo. Awor nan ta mustra riba e deliberacionnan cu ta tuma luga y den cual Rusia tin e arma mas poderoso.

Na varios ocasion DIARIO a mustra cu na momento cu Aruba tabata yega na un acuerdo cu Nicolas Maduro, ya e pais tabata entrega e futuro di Citgo na Rusia y na companianan financiero Mericano.

Na momento cu Citgo a bini Aruba, e tabata un compania hipoteca cu a bira un preocupacion grandi pa Merca, debi na e hecho cu casi mita ta borg di Rusia. For di e tempo Merca a realisa e peliger grandi cu Rusia ta haya un poder financiero na Merca.

Informantenan di DIARIO cu a percura pa un cobertura total di Citgo y a entrega Aruba tur informacion riba e realidad di Citgo cu a keda scondi pa basta tempo pa Aruba, awor ta mustra riba e preocupacion mas grandi di Merca den e conflicto na Venezuela.

Cu Guaidó of cu Maduro, Rusia a garantisa su mes e loke a causa preocupacion na Merca for di 2016, cu ta e derecho di Rusia pa na cualkier momento exigi cu placa ta subi mesa pa e haya su pago for di Venezuela y na momento cu e no ricibi su placa, dicidi cu e ta bira doño di e accionnan di Citgo cu e tin como borg.

Manera DIARIO a relata tambe na 2018, Rusia tabata a cuminsa busca informacion for di 2017 si e companianan Mericano cu a percura pa prestamonan na Venezuela conoci como e bononan 2020, tabata interesa pa bende nan interes financiero den Citgo cu Rusia.

Rosneft, e compania di estado di Rusia cu antes tabata e Ministerio di Asuntonan Petrolero di gobierno Ruso, lo a trata di haya e mayoria di accion den Citgo cu ta den man di financiadonan Mericano.

Na mes momento Rosneft tabata yuda Venezuela,  percura pa e pagonan na e financiadonan pa evita cu falta di pago di parti di Venezuela por a pone mayoria di e accionnan di Citgo den man di e financiadonan Mericano.

Informantenan ta mustra cu e hecho cu Presidente Interino Juan Guaidó awor tin maneho di Citgo den su man, no ta duna ningun garantia di solucion pa e problema cu ta duna Rusia un arma strategico den e conflicto actual.

Aparentemente den e deliberacionnan cu ta tuma luga, Citgo ta un di e temanan central hunto cu e totalidad di pakete di PDVSA,  cu ta un fuente di corupcion investiga na hopi pais.

Na momento cu Rusia por haya mayoria di e accionnan di Citgo,  ni Guaido por stroba Rusia pa dicidi kico ta pasa den Citgo.

E poder cu Guaidó tin na e momentonan aki den Citgo, por pasa den man di Rusia si Rusia haya oportunidad di cumpra dos accionnan mas cerca e grupo di financiadonan Mericano.

Merca di su parti mester a tuma y lo tuma mas medida pa evita cu financiadonan Mericano lo por bende nan accionnan cu Rusia.

Na e momentonan aki Citgo ta na diferente forma presente den Cortenan na Merca. E ta parti di e investigacionnan criminal contra regimen Maduro, e ta borg pa pago di un debe di Venezuela na un compania minero y obheto di casonan cu mas compania a pidi pa entama pa nan trata di haya nan placa.

Sinembargo, na e momentonan aki Citgo ta arma strategico di Rusia cu por dicidi cu e ta tuma e accionnan y asina parti di Citgo.

E realidad di Citgo ta hopi complica y for di bista di e Arubiano cu ta sigui puntra si e proyecto ta bini of no.

- Advertisement -

DUNA COMENTARIO

Please enter your comment!
Please enter your name here