Comision Integridad mester studia reduccion BBO na 2009

    115
    0
    SHARE
    - Advertisement -

    Programa Gobierno Mike Eman tabata basa riba creacion crisis

    *Programa di Partido a splica con lo a crea e crisis di 2018

    *Baha BBO a wordo financia conscientemente cu debe nacional

    ORANJESTAD(AAN)– “Ta sumamente dificil pa Aruba sali sin mas for di e crisis cu a wordo crea na 2009 y a presenta su mes na 2018. E prome tarea di e Comision Integridad cu Aruba ta den formacion na Aruba mester expresa su mes riba loke a pasa na 2009. E programa di gobernacion di Mike Eman na 2009 tabata basa riba financiamento di un accion politico cu placa di pueblo. Den rapportnan oficial continuamente ta wordo papia di cambio den gobernacion pero te awor no a expone loke a pasa manera mester ta.”

    Mas y mas ta bini dilanti cu e situacion financiero di Aruba ta di preocupacion grandi pa presente y futuro y cu continuamente mester mira si medidanan cu ya a wordo tuma ta suficiente pa e pais por sigui dilanti.

    E problema a bira mas grandi ora na 2016 a logra introduci Citgo pa sconde e realidad financiero y economico di Aruba cu tabata den problema serio for di 2014, ora medidanan hopi pisa mester a wordo tuma.

    Segun informantenan di DIARIO pa evita cu Aruba por bolbe cay den e mes problema cu a presenta su mes, e Comision di Integridad den cual tur e organonan oficial di Aruba lo ta representa, mester haya como prome tarea pa studia y duna un veredicto si e programa di gobernacion di gobierno Mike Eman ta permiti segun bon gobernacion.

    A wordo referi na diferente instancia oficial cu a adverti pa e loke tabata tuma luga ora na 2010 a baha BBO pero loke a pasa mescos cu Citgo no a haya ningun forma oficial pa asina por dicidi si loke a hiba Aruba den desaster ta permisibel.

    “E formula cu a wordo aplica tabata cu ta baha BBO y otro belasting y pa haci esaki a pone un suma di 81 Miyon Florin disponibel. Aparentemente e placa aki mester tabata un inversion di pueblo pa asina pueblo haya mas poder di compra.

    Pues den e programa di gobierno Eman directamente tabata tin e formula pa 81 Miyon di pueblo wordo uza sin ningun garantia di exito, pa realisa e promesa politico di eleccion di 2009 di e partido di Mike Eman cu a logra un victoria electoral aplastante,” a wordo mustra na DIARIO.

    E loke a pasa realmente tabata cu AVP a bay eleccion cu un promesa politico cu no tabata realistico pero tambe hopi peligroso. Conscientemente a dicidi pa crea un debe di 81 Miyon Florin pa cumpli cu e promesa politico di baha BBO, cu segun Mike Eman a  bisa e tempo lo a disparce completamente un aña despues.

    Nunca Gobierno Mike Eman a logra deshaci di BBO, pero si a cuminsa crea e debe nacional cu 81 Miyon Florin.

    Kico esaki ta nifica? Segun informantenan mester mira e loke a pasa como un forma di hipoteca futuro di e pais. A haci prestamonan cu pueblo mester a paga despues di tempo.

    “Mike Eman a admiti cu el a crea e formula cu lo a crea un debe cu awe mester paga,” a wordo splica na DIARIO.

    Un par di aña despues no solamente tabata tin e debe nacional, pero mester a busca forma pa evita cu e bom financiero lo a rementa den man di AVP. Esaki tabata e motibo cu Citgo mester a bini pero den e caso aki e proyecto a keda pega den nan tempo.

    Segun informantenan mester bini awor un splicacion di instancianan oficial di e pais si por papia di integridad y bon gobernacion, sin resultado pa e politiconan pero si pa e pais, si gobierno crea un debe cu pueblo mester paga conscientemente.

    Informantenan a bay te den profundidad di e materia cu DIARIO y a mustra riba e sumanan grandi di interes cu pueblo di Aruba mester paga riba e debe nacional cu a wordo introduci pa Gobierno Mike Eman por a cumpli cu su promesa di campaña.

    Organonan di estado di Aruba, cu awor ta traha riba e Comision di Integridad mester uza tanto e creacion di e debe nacional como e forma cu a introduci Citgo pa dicidi si por papia di gobernacion responsabel y integro y ki sancion ta tuma contra politiconan cu pone bienestar di e pais na peliger cu nan promesa di campaña y programa di gobernacion.

    - Advertisement -

    DUNA COMENTARIO

    Please enter your comment!
    Please enter your name here