Home General Concierto Dominical “Donny Laclé” un biaha mas tabata hopi anima y exitoso

Concierto Dominical “Donny Laclé” un biaha mas tabata hopi anima y exitoso

16
0
SHARE
- Advertisement -

ORANJESTAD (AAN): Diadomingo dia 30 di juni 2019, Fundacion pa Talento Musical Donny Laclé a organiza su popular Concierto Dominical den e sala grandi di Biblioteca Nacional Aruba den Madurostraat.

E programa tabata, manera por a spera, interesante y varia y a cay sin duda na agrado di tur hende presente.

E biaha aki a cuminsa cu extende gratitud pa e cooperacion na Ivan Quandus (cabayero di sonido), gerencia y e trahadornan di Biblioteca Nacional Aruba, Ray van Gulick cu ta percura pa e cushina, e grupo di boluntarionan cu tur diasabra prome cu concierto ta prepara y decora e sala pa diadomingo.

Un danki special na CEDE Aruba y Samenwerkende Fondsen Caribisch deel van het Koninkrijk. E artistanan cu ta coopera gratuitamente y e audiencia cu ta acudi fielmente na e conciertonan tambe a haya un palabra special di gradicimento, pasobra sin nan no tin concierto.

E prome presentacion tabata na encargo di e cantante–guitarista Jersey Sofia. Jersey a presenta entre otro “Mi bida dushi”, e cancion cu cual el a debuta na Voz ’i Landia, “Pilar” di Bernadina Growell, “Dushi hende”  cu ta un propio composition di Jersey, “Flor Palida” di Marc Anthony y “Halado” di Upgrade Music. Publico a gosa y canta hunto cu Jersey.

Despues tabatin un presentacion dinamico di Diana Antonette y su Teatro di Danza Arubano. E bailadonan tabata: Mary Hsing, Nico Luydens, Astrianty Croes, Xyqienne Leonardo, Jada van der Linde, Kelanie Thode, Rochelle Jacob y Danouk Jongsma.

Nan a presenta e wals “Abo so” di Padu Lampe, e wals “Arubanita” di Rufo Wever, “Mazurka” di Grupo di Betico, e mazurka “Aire Sentimental” di Padu Lampe, un Baile di Sinta cu caha di orgel, e tambu “Cosecha” di Sodo y Cuero. Diana a duna un splicacion masha interesante di nos bailenan y nan historia.

Durante pausa e publico presente a haci un donacion boluntario cu ta yuda e fundacion yega na suficiente fondo cu na fin di aña por otorga beca pa estudio musical na algun hoben talentoso. Fundacion ta gradici tur hende di curason.

A clausura e mainta cu Tipico Tradicion Musical cu ta bou di direccion di Joffrey Angela. Tipico Tradicion Musical ta existi pa mas di 30 aña caba. Nan a logra pone e pista di baile yena.

E comision organizador ta gradici tur e artistanan y e audiencia pa nan tremendo presentacion, presencia y contribucion na e concierto di dia 30 di juni 2019.

Asina a clausura e prome mita di 2019. Na juli no tin concierto pa motibo di vacacion. Fundacion Donny Laclé ta desea tur hende un bon vacacion. Nos ta topa atrobe  diadomingo dia 25 di augustus e mesun ora y na e mesun luga.

- Advertisement -

DUNA COMENTARIO

Please enter your comment!
Please enter your name here