ORANJESTAD (AAN): Esnan cu ta gusta bay riba cruiseship, sa cu temporada di herfst y winter ta e temporada di oro pa viaha den Caribe. Esey ta ora cu mas barco ta nabegando cu turista den Caribe, compara cu otro temporadanan.
Y entrante November awor, un barco crusero nobo lo ta viahando cu pasaheronan y e lo haci un bishita na Aruba tambe.
E barco MSC Meraviglia ta uno basta nobo, y a bira basta conoci como cu nan tin un partnership exclusivo cu “Cirque du Soleil”.
Dos biaha tur anochi, seis nochi pa siman, pasaheronan riba MSC Meraviglia tin e chens di mira dos di e shownan original di Cirque du Soleil. Ta trata di e show “Viaggio” y tambe e show “Sonor”. Y e mesun sala tambe ta ofrece Cena & Show.
Esaki ta tuma lugar den The Carousel Lounge, cu ta diseña specialmente pa acomoda Cirque du Soleil, y ta mas di 930 meter cuadra, y por acomoda 450 pasahero, incluyendo 120 cu ta gozando di e experiencia completo di Cena & Show.
E prome bishita na Aruba lo ta Diaranzon 6 di November 2019. E barco riba e ruta ey a sali for di New York, y lo finaliza na Miami. Despues di esey, e lo ta saliendo pa e temporada ey for di New York. Lo bishita e.o. Aruba, Curacao, Grenada, St. Maarten, Martinique, y tambe e isla priva Ocean Cay na Bahamas.
