ORANJESTAD (AAN): Un di e personahenan di TV Venezolano cu ta hopi admira na Aruba tambe, esta Carmen Victoria Pérez, a fayece recien, y Dialuna su entiero a tuma lugar na Caracas.
Cu ronda di aplauso, cu ta loke semper el a goza di dje den su bida, riba Dialuna e famia-, amigo-, artista- y colegana di trabao a bisa nan ultimo ayo na e tan stima animadora Carmen Victoria Pérez.
Na e kapel di Cementerio del Este, a tene un Sacrificio di Misa. Na final di esaki, a bay cu e restonan mortal di e kapel pa un lugar unda a prepara cremacion.
Durante e ceremonia religioso, e periodista Isnardo Bravo, kende tabata presenta tambe cu Carmen Victoria den un programa na La Romantica FM, a dedica algun palabra.
El a recorda e paso di Carmen Victoria via di TV, via radio, y tambe shownan cu e tabata maestro di cermemonia, incluyendo gala di Miss Venezuela for di decada di 1980. E tabata haci esey na comienzo hunto cu Amador Bendayan. Prome cu esey e tabata traha como bailarina cu Renny Otolina, kende ta wordo considera como un di e icononan di TV Venezolano.
“La Flaca” Carmen Victoria Pérez a fayece Diasabra 27 di Juli na Caracas debi na un atake di curazon. E tabatin 78 aña di edad.
E mesun dia ey, Bravo a despedi di Carmen Victoria riba Instagram bisando: “Danki Dios cu tur cos cu mi a sinti di ta cerca di bo mi casa, bo por a scucha. Por fabor, mi ta pidi bo yudami for di unda bo ta, pasobra aworaki mi no sa con mi lo bay haci NOS programa sin bo.”
Entre esnan presente na e misa, tabatin e conocido Gilberto Correa kende a presenta como MC hunto cune tambe den certamen di Miss Venezuela. Carmen Victoria a yega di traha pa tanto Radio Caracas Television como tambe pa Venevision. Den e ultimo aki, el a forma parti tambe di e show di Sabado Sensacional, cu tabata un di e shownan mas grandi y di hopi tempo na Venezuela. Dos biaha tambe Sabado Sensacional a bin haci show en vivo na Aruba.
Despues di TV, el a dedica su mes ultimo añanan na programa di radio.
Na e santana, un sobrina di dje, esta Victoria Eugenia Gimenez Pérez, a bisa cu un di e cosnan cu mas ta lage feliz tabata cu el a mira con su tanta a hiba un bida asina digno, profesional, y cu hende stime y ta keda corde cu hopi cariño.
Periodistanan a entrevista e ex-Miss, Nina Sicilia y el a bisa cu e ta sinti su mes hopi honra di a yega di traha cu Carmen Victoria Pérez, kende e lo keda corda pa su carisma, talento, y generosidad.
Otro presentador di TV, Maite Delgado cu ta awor hopi na Aruba, riba Instagram a describi Carmen Victoria Pérez como “e animadora mas grandi y mihor di TV Venezolano”
Dia 13 di Juli cu a pasa, Universidad Catolica Santa Rosa a entrega na Carmen Victoria Pérez un titulo di Comunicadora Social “honoris causa”, pa su carera den TV y radio.
E periodista Roland Carreño den su mensahe di despedida, a bisa: “Tur hende lanta para pa despedi di dje. E voz di e animadora mas grandi di tur tempo na Venezuela a paga. Danki Carmen Victoria Pérez pa asina hopi deroche di clase, estilo, elegancia, dignidad, y tipico Venezolano.
