Home Editorial Curaçao a duna prueba di e riesgo grandi di PDVSA

Curaçao a duna prueba di e riesgo grandi di PDVSA

79
0
SHARE
- Advertisement -

Editorial

Na momento cu Antia Hulandes na añanan 80 a atrae PDVSA pa reapertura di e refineria cu tabata di Shell, no por a mira cu den futuro e compania Venezolano lo a wordo dirigi dor di un gobierno dictatorial cu lo a percura pa un crisis mundial. Ora e situacion a cambia na Venezuela, e refineria di Curaçao a cay directamente bou di e maneho nobo di Hugo Chavez, cu a cambia PDVSA den un nucleo di poder pa paisnan comunista.

Na Venezuela mes problemanan grandi a surgi cu cambio cu a wordo haci den personal y militarisacion di e compania estatal Venezolano.

E Curaçao cu a firma e acuerdo cu PDVSA, no por a idea loke a pasa e siman aki. Pueblo di Curaçao a wordo sorprendi pa yegada di e funcionario di regimen Nicolas Maduro, cu Reino Hulandes na Januari 2019 a rechasa como Presidente di Venezuela. E funcionario a bay topa cu personal di e refineria di PDVSA pa bay bisa nan cu e regimen Comunista di Nicolas Maduro stima trahado y lo paga nan tur placa cu e mester paga.

Tambe el a bisa cu Venezuela ta interesa pa keda cu e refineria, cu nunca PDVSA a mantene loke tabata e motibo principal pa busca otro operador. Un grupo grandi di trahado cu a perde nan pan for di e momento cu e refineria a stop produccion, tabata scucha, sabiendo cu si nan perde nan trabou ta dificil pa haya otro den e economia local cu PDVSA a destrui.

Con tabata posibel pa un representante di Maduro a actua na nomber di Venezuela den e caso aki? Con e por a baha riba teritorio cu fronteranan cu Reino Hulandes cera? Facil! Su aliadonan den e refineria y den sindicalismo na Curaçao. For di 2016 Curaçao no a conoce paz mas cu accionnan centralisa continuamente rond di e refineria caminda e sindicato principal tin relacion directo cu Nicolas Maduro mescos cu politiconan iskierdista cu conexion cu e sindicato.

Pakico DIARIO a haci tanto esfuerso pa mustra Aruba e peligernan cu e proyecto refineria di Citgo ta encera? Pasobra nos mester proteha e siguridad y bienestar di nos pais y Arubianonan cu conexion cu regimen Chavista ta pone na riesgo.

Ayera na Spaña, autoridadnan a anuncia cu un ex funcionario halto di PDVSA den tempo di Hugo Chavez, a comete suicidio na Spaña, caminda el a wordo deteni pa un caso di labamento di placa. Na Merca manera nos a relata, ya 15 persona a admiti culpabilidad den crimennan cu ta varia di ladronicia pa labamento di placa. Ayera Grupo di Lima, cu a wordo forma a base di e problemanan na Venezuela, a dicidi cu awor e ta bay investiga tur posibel caso di criminalidad den cual funcionarionan di regimen Maduro por ta envolvi.

E informacionnan tabata sigui otro. Mientras Merca a adverti Nicolas Maduro cu e mester baha, e Presidente Interino Juan Guaidó a bolbe mobilisa pueblo den un Venezuela practicamente sin coriente.

Insiguridad, incertidumbre ta culmina rond di Aruba. Problemanan financiero nos lo resolve si nos tin e trankilidad. Pero nos democracia ta na peliger si regimen Maduro tin nos economia den su man.

Na 2017 Reino mester a interveni pa eleccion democratico tuma luga na Curaçao, cu a logra deshaci di un intento pa stop eleccion liber dor di politiconan iskierdista,  amigo di regimen Maduro.

Na 2016 Nicolas Maduro a haya economia di Aruba den su man pa medio di Citgo cu tabata un fantasma economico pero si un peliger grandi pa nos trankilidad y siguridad nacional. Awe Aruba ta na tempo pa scapa su futuro, pasobra ningun hende por bisa kico lo pasa na Venezuela y con regimen Maduro ta infiltra hasta ora frontera ta cera.

- Advertisement -

DUNA COMENTARIO

Please enter your comment!
Please enter your name here