Minister di Finanzas ta splica:
ORANJESTAD (AAN): Minister di Economia, Finanzas y Cultura mr. Xiomara Ruiz Maduro, tambe a participa den e conferencia di prensa di gobierno, Diahuebs, y a elabora riba un cambio tocante dunamento di boet door di Departamento di Impuesto.
E mandatario a duna di conoce cu Departamento di Impuesto a flexibiliza e sistema pa cobra boet. El a splica cu ta un derecho di Inspector di Belastingdienst, cual ley ta brinde, pa pone multa ora ta trata di incumplimento cu pago di impuesto.
El a indica cu den e proceso cu SIA ta den dje di automatizacion, a trece cune cu aworaki compara cu antes, ora un persona no cumpli cu belasting, ya caba automaticamente, e computer mes ta genera un multa.
Esaki ta trece cune conforme ley cu e sistema ta genera e boet y e pagador di impuesto ta ricibi esey.
Door cu prome e proceso aki tabata manual e tabata tarda hopi prome cu e persona tabata haya e multa. Pero pa motibo cu nan a bin cu e sistema di automatizacion cu a finaliza na April 2018, e contribuidornan cu no a cumpli cu nan pago di impuesto na tempo, a haya e cobranzanan un tras di otro.
Esaki, den e fase di transicion aki, ta trece pa pueblo un inkietud cu ta haya un cobranza tras di otro, den e caso aki di 2015 te 2018 y hunto cune ta bin e cobranza adicional y e multa.
Pues den e percepcion di e pueblo nan ta haye mas lihe. Mirando tur e inkietudnan cu tin den e comunidad, den deliberacion cu Departamento di Impuesto y den cuadro di ley, ya cu desde 2014 caba ta existi cu inspector di belasting por duna multa, despues di inversionnan den automatizacion e sistema mes ta genera e multa, pa yuda den e aspecto aki a bin cu flexibilizacion cu ta conta pa e periodo di 2015 pa 2018. Esaki ta nifica cu pa 2019 bay dilanti mester cumpli cu e ley manera e ta stipula caba desde aña 2014.
E mandatario a subraya cu ta importante pa tur hende sa cu tin cu cumpli cu nan obligacionnan fiscal. E flexibilizacion ta pa brinda e oportunidad pa e pueblo custumbra cu e sistema nobo aki. E maneho aki ta conta for di 4 di Juli 2019 padilanti, pa e impuestonan cu ta wordo paga mensual manera loonbelasting, BBO, BAZV, BBAVP, impuesto riba turismo, etc.
E mandatario a subraya cu esaki tambe ta importante pa e aspecto di restitucion. E dignatario a menciona cu na e momentonan aki Departamento di Impuesto ta trahado riba e parti di restitucion di aña 2015.
E dignatario a expresa cu e ta spera cu di e manera aki por yuda pueblo pa asina por cumpli cu su deber. Si un y tur cumpli cu su pago di belasting, manera mester ta, tur hende ta paga menos. Pero si no tene na cuenta cu e fechanan cu mester cumpli cune, e contribuido ta haya su mes den problema y ta haya boet.
E cumplimento di pago a subi di 60 pa 70% loke ta mustra cu e pueblo ta cumpliendo, y e tin di haber cu ehercicionan cu ta wordo haci riba e parti di control cu tambe a wordo pidi, pasobra tin cu no ta cumpliendo cu nan obligacion y Departamento di Belasting ta trahando riba dje.
Aworaki, e minister a destaca, tin mas facilidad pa paga via online y pesey nan ta invirtiendo mas den automatizacion na Departamento di Impuesto pa e servicio na comunidad ta mas eficiente.
