Hues a confirma exigencia di Fiscal
ORANJESTAD (AAN) – Manera DIARIO a publica, ayera mainta Hues a duna su decision den e caso penal cu Ministerio Publico a cuminsa contra Alexander Ras.
CULPABEL DI A HINCA MATA:
Hues a bisa cu e ta haya legalmente proba cu Alexander Ras riba 7 November 2018 a mata Juraima Wouters y tabatin un cantidad di cocaina hunto cun’e.
RECHAZA DEFENSA PROPIO:
Hues a duna su opinion riba e defensa cu a bisa cu Alexander Ras a defende su mes. Hues a bisa cu abogado a bisa cu Alexander no tabatin intension di mata su amiga Juraima. Hues a bisa cu e tin otro opinion.
Hues a mustra cu a base di testigonan a mira cu Alexander cu forza a hinca e victima Juraima den pecho, cu a causa cu Juraima a muri. Hues a bisa cu door di e hinca, Alexander a bora curazon di e victima cu a pon’e muri.
Hues a bisa cu e ta rechaza e defensa su punto di bista cu Alexander a actua den defensa propio pasobra cu e victima Juramia lo a purba hink’e cu un schroefdraaier.
Hues a bisa cu testigonan a mira cu tabatin un discusion y cu Alexander a cana bay. E victima Juraima a cana su tras y a dal’e. Despues di esey, Alexander a hink’e. Hues ta haya cu esey no ta defensa propio. Hues a bisa Alexander cu e no mester a reacciona di e forma ey.
CASTIGO:
Pa cu e castigo, Hues a tene cuenta cu Alexander a kita bida di un persona cu ta di famia. A pone e mama y tata sufri un perdida. E tata di e victima tabata wowo yen awa ora cu Hues a bisa esaki. Hues a sigui bisa cu Alexander a causa inseguridad den comunidad. E lamentable incidente aki a sosode riba caminda publico y otro hende a mira esaki.
Hues a sigui bisa cu e ta tene cuenta cu e raport di psycologo y cu Alexander a haci e delito aki den su tempo di prueba. Hues a bisa cu e ta comparti Fiscal su exigencia.
Hues a condena Alexander na 10 aña di prison y e demanda di daño di casi 8 mil florin ta keda aproba. Hues a bisa cu e ta pone e medida di pago. Esey ta nifica cu Ministerio Publico ta percura pa Alexander paga sino e ta haya mas castigo. Ademas Hues a pone riba e 10 aña e 1 luna di prison condicional cu Alexander tin y a haci e delito serio aki den su tempo di prueba.
