Home Cultura Dr. Benjamin Zander: mira oportunidad caminda otro ta mira desesperacion

Dr. Benjamin Zander: mira oportunidad caminda otro ta mira desesperacion

63
0
SHARE
- Advertisement -

Awe Nochi na Cas di Cultura,

Un di e eventonan mas interesante di e Aruba Symphony Festival 2019 ta tuma lugar awe, dialuna, juli 22, cuminsando 8’or di anochi, den sala grandi di Cas di Cultura.

E evento no ta musical, pero e ta wordo presenta pa un musico. Awe nochi Aruba lo tin e privilegio di scucha Dr. Benjamin Zander duna un lectura tocante positivismo, optimism y liderato.

ORANJESTAD (AAN):  Segun Unique Speaker Bureau, un agencia cu ta busca celebridadnan pa duna lectura, Dr. Zander ta ricibi entr $50,000 y $75,000 pa un lectura. Dr. Zander, fundador y director di Boston Philharmonic Orchestra y di Boston Philharmonic Youth Orchestra, ta miembro di e directiva di asesornan internacional di Aruba Symphony Festival. Danki na su relacion cu Aruba Symphony Festival, Dr. Zander su lectura ta un regalo pa Aruba, y entrada ta completamente GRATIS.

Dr Zander a yega di duna varios discurso di apertura na e Davos World Economic Forum caminda el a ricibi e Crystal Award pa su “Contribucionnan na Arte y Relacionnan Internacional”. Na 2007 e Instituto Internacional di Boston a presenta e premio Golden Door na Dr. Zander pa su contribucionnan como un ciudadano Americano naci den exterior, na pueblo Americano. E buki cu Dr. Zander y su esposa a skirbi, “The Art of Possibility” a wordo traduci den 18 idioma. Na 2002 Nacionnan Uni a otorga Dr. Zander e premio “Caring Citizen of the Humanities.” Mas di 10 miyon hende a wak e video di Dr. Zander su TEDtalk tocante Poder Transformativo di Musica Clasico.

Benjamin Zander Tabata e suheto di un documental di largo metrahe di BBC cu a wordo transmit mundialmente; el a parece riba e Famoso programa 60 Minutes di CBS y e ta topico di articulonan den hopi revista, entre otro, “Fast Company”.

Den un articulo Making “Way” out of “No Way”: Innovation Means Optimism’ publica den e revista ChoralNet, Tim Sharp ta skirbi:
Den su buki ‘The Art of Possibility’, Dr. Benjamin Zander ta conta e storia di dos bendedo di sapato cu a bay un pais den desaroyo pa studia e posibilidad di aumenta benta. Uno a manda un telegram bisando: “situacion sin speransa – aki nan no ta bisti sapato aki”. E otro a skirbi yen di optimismo: “oportunidad glorioso – aki nan no tin sapato.”

Pa persigui optimismo enfrentado e retonan, bo mester tin e curashi y persistencia pa separa e spiral bayendo abou, for di e mundo di posibilidadnan. Mester forma bo combersacionnan cu otronan, y esnan cu ta tuma luga den bo propio cabes, den e claridad di luz di e posibilidadnan.

Hopi pensado contemporaneo ta cita e teoria cu ta considera “dificultad deseabel” pa traha cu optimismo pa inovacion. “Dificultadnan deseabel” ta retonan na nos pensamento y nos trabou cu normalmente ta parce obstaculo den nos progreso. E desventaha aki ta forsa e persona pa adapta y pa ta miho prepara pa dificultadnan den futuro. Mirando e retonan aki como “deseabel” ta un atitud optimista, reconociendo cu retonan ta yuda afila ideanan y ta haci mas fuerte e decision pa bay dilanti.


Optimismo no ta speransa ciego. E ta e fe cu sigur un idea lo surgi cu lo funciona. Experiencia a demostra constantemente cu di berdad un idea lo presenta su mes cu lo dirigi nos na un solucion. Ora cu pesimismo cuminsa stroba e buskeda pa inovacion, deshaci di e poco duda cu por drenta den bo mente, cu e siguransa cu lo tin un solucion. Kere den e poder di exito caminda otronan ta mira fracaso. Mira e oportunidadnan caminda otro ta mira desesperacion.

Awe nochi, bin scucha Dr. Zander, un persona di nivel mundial, papia di topiconan importante y popular. No perde e oportunidad unico aki! Entrada ta GRATIS.

- Advertisement -

DUNA COMENTARIO

Please enter your comment!
Please enter your name here