Home Economia Durante luna di Mei a drenta 31 miyon Florin menos den caha...

Durante luna di Mei a drenta 31 miyon Florin menos den caha di Gobierno

30
0
SHARE
- Advertisement -

Desaroyo monetario

ORANJESTAD (AAN): E boletin di desaroyo monetario emiti pa Banco Central di Aruba, ta mustra cu compara cu april 2019, den e luna di mei 2019, e cantidad di placa den circulacion a baha cu Afl. 60,2 miyon te na Afl. 4.402,8 miyon. Esaki a resulta for di un reduccion den reserva di divisa netto (-Afl. 152,2 miyon) y un subida den e activo domestico netto (+Afl. 92,0 miyon).

E caida den e reserva di divisa netto di e sector bancario ta debi na benta netto di divisa na publico (-Afl. 324,9 miyon), primordialmente relaciona cu entrada for di importacion di mercancia, otro inversion y otro servicionan. Esaki a worde pa un gran parti mitiga pa compra netto di divisa for di publico (-Afl. 172,7 miyon), primordialmente relaciona cu entrada for di turismo.

E expansion den e activo domestico netto a worde causa pa subidanan den credito domestico (+Afl. 88,0 miyon) y transaccionnan no relata na credito (+Afl. 4,0 miyon). E crecemento den credito domestico a resulta for di un subida den credito bancario netto na e sector priva (+Afl. 78,2 miyon) y den credito bancario netto na e sector publico (+Afl. 9,8 miyon).

E expansion den credito bancario netto na e sector priva ta debi na subidanan den credito na empresa (+Afl. 74,2 miyon) y hipoteca pa vivienda (+Afl. 6,6 miyon), cual a worde parcialmente mitiga pa un caida den credito na consumidor (-Afl. 2,7 miyon). Credito bancario na e sector publico a subi door di mas debe di gobierno (+Afl. 85,1 miyon) cu a worde mitiga pa un gran parti pa un subida den e depositonan di gobierno (+Afl. 75,3 miyon).

   Inflacion:

E nivel general di prijs, cu ta worde midi door di e indice di prijs di consumo, a registra un subida di 4,8 porciento den e luna di mei 2019, compara cu mei 2018. E contribuyentenan principal na e aumento aki tabata e componentenan “Cuminda y Bebida No-Alcoholico” y “Comunicacion”.

Ademas, si exclui e componentenan di cuminda y energia for di e indice di prijs di consumo, inflacion a mustra un aumento di 2,9 porciento compara cu mei 2018. Pa loke ta trata e promedio anual di e tasa di inflacion, esaki a registra 4,4 porciento na mei 2019, compara cu 4,3 porciento na april 2019.

Entrada di Gobierno:

Na mei 2019, entrada di gobierno a suma Afl. 161,7 miyon, cual ta Afl. 31,4 miyon menos compara cu e mesun luna di e aña anterior.

Esaki a resulta for di reduccion den tanto entrada no relata na impuesto (-Afl. 24,7 miyon) y entrada di impuesto (-Afl. 6,8 miyon).

E bahada den entrada di impuesto a resulta principalmente door di menos entrada for di impuesto riba ganashi (-Afl. 14,1 miyon), impuesto riba salario (-Afl. 6,6 miyon) y impuesto riba importacion (-Afl. 1,6 miyon).

E bahadanan aki a worde mas tanto mitiga pa aumento den impuesto riba benta di negoshi (+Afl. 9,5 miyon; introduccion di B.A.V.P compara cu e mesun luna den 2018) y impuesto riba  propiedad (+Afl. 5,2 miyon).

E biaha aki cifranan di Turismo no tabata disponible ora cu Banco Central a haci e analisis.

 

- Advertisement -

DUNA COMENTARIO

Please enter your comment!
Please enter your name here