Home Enseñanza Expertonan rond  mundo preocupa cu e echo cu hopi mucha a perde...

Expertonan rond  mundo preocupa cu e echo cu hopi mucha a perde e abilidad pa concentra

37
0
SHARE
- Advertisement -

Segun directora di Departamento di Enseñanza

ORANJESTAD (AAN):  Anne Marie Proveyer-Groot ta directora di Departamento di Enseñanza y el a indica den entrevista cu DIARIO cu mester para keto un rato y analiza kico uin tablet ta nifica vs. un buki y kico siñamento ta.

Ta conoci cu awendia e sistemanan di enseñanza ta haciendo uso di e tecnologia pa siña e hobennan. Na Aruba por mira ta haci esaki pa medio di e uso di tabletnan.

Directora di Departamento di Enseñanza a splica cu siñamento ta compronde algo cu por use den bida. No ta importa for di unda ta haya e informacion y di ki forma. Por ta cine, television, por ta un buki, tablet of telefon.

Loke ta mas importante y esey e enfoke mester ta cu nos ta busca informacion di calidad, cu nos ta echt averigua di unda e informacion aki ta bin y si e ta un fuente confiabel, a indica.

Proveyer-Groot ta remarca cu e enfoke mester ta ariba esey. Kico ta e calidad di e informacion. El a bisa cu eynan e tin su preocupacionnan pasobra si ta duna un buki, e buki ta scogi door di e sistema di enseñanza  y por bisa e mucha cu loke tin den e buki ta importante pa e sa.

Si ta laga un mucha bay ariba media, nan por bay unda cu ta. Den mundo di enseñanza tin hopi material ariba media, pero e habilidad ainda pa bay wak kico ta e informacion valioso of no mester tey, a señala.

Duna un mucha un tablet cu un buki ariba dje y duna un mucha un buki den su man. Ta mesun cos. E tablet e no kier uza pa lesa un buki. E tablet e kier uza pa wak cosnan visual manera movecion, pelicula.

“Esey ta un cos cu ta preocupa mi si”. Un tablet ta interesante si e ta bira interactivo, si tin programanan ariba dje, cu e mucha por yena un som, anto e som ta detecta e nivel cu e mucha ta funciona ariba dje, anto ta busca un otro som cu ta pas na unda e mucha ta por ehempel”, a splica.

E ta haya importante e echo cu e muchanan ta perde concentracion ariba kico lesamento ta. Lesamento ta sinta keto, concentra y focus. Ta ripara cu e abilidad e muchanan no tin’e mas. Nan no por sinta un par di minuut of mey ora pa lesa, concentra y studi’e, pasobra cada 5 minuut nan mester haci algo otro.

Diferente experto den enseñanza rond mundo ta preocupa pa e parti ey, a remarca.

Segun Anne Marie Proveyer-Groot, pa 2020, ta bay pone focus ariba kico siñamento ta y no kico enseñanza ta nifica. Con un mucha ta siña, ki pasonan mester tuma, kico mester brinda un mucha pa e por desaroya e abilidadnan pa sigui siña y den esey idioma y comunicacion ta hunga un rol.

Esaki ta elementonan cu kier hinca den e proyecto multilingual SAM cu ta bezig ta implementando den enseñanza, pero tambe den diferente tipo di enseñanza.

A indica cu door di e influencia di tur e gadgetnan ey, e marketing di e tablets y programanan ta masha grandi. “Enseñanza mundialmente no tin suficiente power te ainda, pasobra nos ta preparando nos mes, pa contraresta esey. Bende un tablet ta masha facil, pero esey no ta e necesidad cu e mucha tin. E mucha mester tin un bon contenido den e tablet”.

 

- Advertisement -

DUNA COMENTARIO

Please enter your comment!
Please enter your name here