Home Enseñanza Gobierno cu bunita proyecto di enseñanza avanza pa aña escolar 2020-2021

Gobierno cu bunita proyecto di enseñanza avanza pa aña escolar 2020-2021

47
0
SHARE
- Advertisement -

Pa e hobennan cu ta caba Scol Dun’un Man:

ORANJESTAD (AAN) – Den conferencia di prensa di Gobierno, Prome Minister mr. Evelyn Wever-Croes, a toca e tema di enseñanza avanza pa nos muchanan special.

“E ta asina aki cu ya desde algun luna cu mi a institui e comision cu ta bay encarga cu inclusion, unda nos ta trahando riba un plan na termino corto pa e aspectonan mas urgente, termino medio y termino largo; y den e cuadro aki, un di e preocupacionnan hopi grandi cu tin na Aruba ta, cu pa nos hobennan cu ta caba scol Duna un Man, no tin un enseñanza cu por sigui despues. Di facto nan tin cu bay cas, y tur loke nan a siña eigenlijk ta bay perdi, sea pasobra nan no tin edad suficiente pa bay traha, of ta cay den e circulo di trampolin pa bay traha pasobra nan ta jong. Cu 15-16 aña tin biaha, nan ta caba scol”, Minister Presidente a splica.

El a agrega cu pa hopi tempo gobierno ta mirando kico pa haci pa soluciona e parti aki.

Den deliberacion, a bin compronde cu e Stichting ta cay bao di Minister di Asunto Social, y a bati na su porta y hunto cune y cu e Stichting SVGZ, a yega na e palabracion cu gobierno ta bay traha riba enseñanza avanza pa e hobennan special, ora nan caba scol Dun’un Man no keda manera no tin nada mas pa nan.

“No! Tin un scol pa prepara nan mes pa e siguiente paso den bida cu ta pa nan traha. Varios di e hobennan aki, cu guia y asistencia, por haci mayoria di trabaonan cu tin na Aruba.  Por weita varios comerciante cu tin hobennan special ta traha cu nan. Tin algun otro cu kizas no por bay traha caminda tin hopi publico, pero si por haci otro cosnan. Pesey, ta importante pa traha riba e parti di enseñanza avanza pa nos hobennan aki”, Minister Presidente a acentua.

Premier Wever-Croes ta lamenta cu no por keda cla cu e scol aki pa e siguiente aña escolar 2019-2020, cu ta habri na Augustus proximo, pasobra e ta algo cu ta tuma su tempo, pero nos ta trahando riba dje pa e bira un realidad pa aña escolar 2020-2021.

Pero e otro aña mester ta cla pa e muchanan cu ta caba scol Dun’un Man den e temporada aki, sa cu despues di vacacion nan tin un scol pa bay bek.

E mandatario a duna di conoce cu pa e grupo cu a caba e aña aki, Minister Glenbert Croes a regla pa di un of otro manera, nan tin un lugar pa bay cu tin curriculum y e ta dedica na esey.

Minister Presidente a gradici, specialmente e comision bao guia di sr. Hans Geerman, y Minister di Asuntonan Social, cu tabata asina diligente riba un solucion aworaki pa un aña so, pero trahando di biaha pa e solucion structural cu ta bay bin despues. “Pasobra nos tin cu corda cu nos muchanan special tambe merece di haya oportunidad den bida, y ta nos deber pa brinda nan esaki”, e dignatario a expresa.

E Crisis Plan Social ta pa esnan mas vulnerable den nos comunidad, y e muchanan special ta hopi vulnerable y no por tin un hende cu por ta contra esaki, e dignatario a conclui.

- Advertisement -

DUNA COMENTARIO

Please enter your comment!
Please enter your name here