Home General Hulandesnan nobo a haci declaracion di sentimento di vinculo cu Reino Hulandes

Hulandesnan nobo a haci declaracion di sentimento di vinculo cu Reino Hulandes

93
0
SHARE
- Advertisement -

ORANJESTAD (AAN): Diahuebs mainta, 18 di juli 2019, a tuma lugar un ceremonia festivo di naturalisacion. E ceremonia aki ta un encuentro special pa e personanan cu ta haya e nacionalidad Hulandes. Durante e ceremonia e persona ta haci declaracion di sentimento di vinculo cu Reino Hulandes.

Dilanti di e Gobernador interino di Aruba, Yvonne Lacle-Dirksz, 77 persona procedente di 15 diferente pais a huramenta of a priminti di ta sinti nan mes parti di Reino Hulandes y cu nan conoce e leynan di Reino Hulandes y cu nan lo atene nan mes na e leynan aki.

Di e manera aki nan a haya formalmente e nacionalidad Hulandes, incluso e obligacion y derechonan cu e nacionalidad Hulandes ta trece cu ne, manera entre otro e derecho di voto activo of pasivo y e paspoort Hulandes. Aruba ta tene 3 of 4 biaha pa aña e ceremonia di naturalisacion.

Hayamento di nacionalidad Hulandes:

Por haya nacionalidad Hulandes na dos manera, via opcion of via naturalisacion. Cada un ta cana nan mesun procedura. Pa tur dos procedura mester entrega documento oficial manera entre otro acta di nacemento, acta di matrimonio, paspoort y e permisonan di estadia.

   Naturalisacion:

Por pidi pa haya nacionalidad Hulandes pa medio di naturalisacion. Pa bin na remarca pa e procedura di naturalisacion, e persona mester cumpli cu cierto condicion, entre cual un estadia di 5 aña consecutivo den Reino Hulandes cu permiso di estadia valido, pasa e examen di integracion cu exito y no tin un condena pa un delito den e ultimo 5 aña.

Mester entrega e peticion pa naturalisacion na Kabinet di Gobernador di Aruba. Minister di Seguridad y Husticia di Hulanda tin e autorisacion pa evalua e peticion y tuma decision.

   Opcion:

Den algun caso por haya e nacionalidad Hulandes pa medio di haci un declaracion di opcion. Esaki ta conta pa un grupo specifico menciona den e ley. Ta trata di por ehempel di personanan cu berdaderamente ya desde nan nacemento ta biba den Reino Hulandes y tin permiso valido di estadia.

Ta entrega e peticion pa declaracion di opcion tambe na Kabinet di Gobernador di Aruba.

Potretnan aki pa cortesia di Kabinet di Gobernador.

- Advertisement -

DUNA COMENTARIO

Please enter your comment!
Please enter your name here