Indexering lo hinca Aruba den spiraal fatal 

    529
    0
    SHARE
    - Advertisement -

    Hulanda lo no mantene silencio si aumenta gasto mensual 

    *Gobierno ta emplea 8 porciento di trahado na Aruba

    *Indexering lo produci mas medida y mas inflacion 

    ORANJESTAD (AAN) — E exigencia di trahadonan di Gobierno pa nan entrada wordo aumenta cu e cifra di inflacion, no ta un problema solamente pa gobernacion.  E situacion economico di Aruba cu mester produci entrada na gobierno, no a conoce alivio y speransa ta fiha riba proyectonan cu mester haya desaroyo.

    E desenlace di Citgo ainda por produci mas problema pa Aruba cu mester negocia un posibel salida for di e acuerdo cu a firma na 2016. Den un situacion mundial turbulento buskeda di un operador pa e loke a resta di e refineria, no ta nada facil.

    “Gobierno a hereda un pakete financiero, economico, social sumamente dificil. Cualkier gasto adicional, lo nifica medida adicional mientras mester tene cuenta cu e spiraal sumamente peligroso cu ta wordo crea,” informantenan a mustra DIARIO.

    E spiraal di inflacion ta loke mas ta teme na Aruba. Un aumento di entrada di trahadonan di gobierno lo nifica cu gobierno lo mester introduci medida nobo pa haya placa pa por paga.

    “Gobierno di Aruba no tin espacio y lo mester tuma medida pa paga sumanan mas halto tur fin di luna ya cu no ta trata di un solo pago pero di pago mensual mas halto,” a wordo indica.

    Mester tene cuenta cu na e momentonan aki tambe e asunto di supervision di Hulanda mester wordo clarifica ainda. E supervision ta data for di 2015 ora gobierno anterior a drenta un areglo cu Hulanda a base di un drama cu gobierno anterior a crea ora su maneho financiero a bira contra tur regla normal.

    Awe e situacion no a wordo resolve y por spera mas problema si Aruba bay aumenta su gastonan, mientras cu gastonan di personal ta uno di e problemanan grandi cu semper ta wordo treci dilanti den rapportnan.

    “Gobierno ta den top di companianan y instancia cu ta emplea trahado na Aruba. 8 porciento di trahado na Aruba tabata empleado publico na 2016. Den Horeca 22 porciento di trahado tin trabou, den comercio 17 porciento, construccion, huur y gobierno cada uno cu 8 porciento,” a wordo indica.

    Varios rapport ta indica cu gobierno hasta lo mester yega na baha gasto di su personal den tal forma, cu mester baha e cantidad di personal. Un asunto cu den e situacion cu Aruba conoce actualmente no a tene na consideracion.

    Importante ta cu si aumenta e salarionan den gobierno, otro sectornan lo reacciona pasobra nan lo no por paga mas medida y na mes momento keda cu e salario cu nan tin.

    Esaki lo causa e reaccion di inflacion cu lo hinca Aruba den problema serio, segun informantenan cu ta kere cu actualmente mester tuma otro tipo di medida.

    Mester trata di mantene mas tanto trahado posibel na trabou, loke ta encera cu lo mester baha trahado stranhero. No por aumenta e cantidad di personal di gobierno, cu mester mira con e ta sigui reduci su gastonan mas cu e ta haci actualmente.

    Na momento cu paga ambtenaar y otro trahadonan drenta den accion, e pais ta drenta un spiraal di inflacion peligroso pero tambe lo enfrenta un grado halto di insiguridad.

    E exigencia pa indexering tin Aruba preocupa. Tur documento cu DIARIO consulta, ta sigui indica cu medidanan mester a wordo tuma hopi aña pasa y cu Aruba ta biba cu un situacion cu mal maneho local y incidentenan internacional a provoca.

    Ta ora logra rebiba economia lo por tin aliento nobo den e situacion local y mundial actual.

    “Importante ta evita tur problema cu por afecta turismo. Si turismo wordo afecta, Aruba lo conoce un desastre economico, financiero y social,” ta e advertencia serio.

     

    - Advertisement -

    DUNA COMENTARIO

    Please enter your comment!
    Please enter your name here