Home General Kibra inflacion cu solucion gastonan familiar

Kibra inflacion cu solucion gastonan familiar

481
0
SHARE
- Advertisement -

Cifranan ta expone realidad di e situacion peligroso di Aruba 

*Entrada di comercio no ta permiti mas peso di inflacion

*Solucion pa vivienda cu ta mas cu un tercer parti di gastonan 

ORANJESTAD(AAN)- “Aruba a yega na otro momento crucial.  Mal maneho dirigi riba popularidad politico a hinca Aruba den un desastre casi total. E unico forma cu Aruba por coregi pasado y yega na solucion pa futuro ta, pa kibra e spiraal di inflacion pero tuma medida directo contra medidanan importa cu ta afecta bienestar di e ciudadanonan di Aruba.”

Esaki ta e base di e pensamento di informantenan experto di DIARIO, cu a comparti cifranan cu ta demostra kico e problema di Aruba ta y pakico Aruba ta den problema serio actualmente.

“Gastonan di vivienda mester baha. Hunto cu transportacion, vivienda ta e gasto mas grandi cu e trahado Arubiano conoce. Mester atende awor e problema mas grandi cu e famia na Aruba conoce y cu ta wordo genera dor di problema cu Aruba a importa y tin problema pa soluciona,” a wordo treci dilanti.

Cifranan di e Oficina di Estadistica di Aruba pa mustra na kico pueblo di Aruba ta gasta su placa. ta duna un indicacion directo cu for di 2016, comercio di Aruba tabata uno di e sectornan cu menos tabata disfruta di e entrada familiar na Aruba.

“E Arubiano na 2016 a gasta solamente 2.2 porciento di su entrada pa paña y sapato, cu por wordo considera como e gastonan pa uzo personal mas importante. Den e 9.8 porciento cu a gasta na asuntonan general, tambe lo topa cu algo di e gastonan cu por wordo atribui na comercio local general mescos cu ta e caso cu 7.5 porciento pa gastonan den un cas. Si pone comunicacion tambe den comercio local, ta pone 7.3 porciento ariba e suma,” a wordo treci dilanti.

E gastonan cu ta primi mas tanto riba e trahado ta e gasto di vivienda, cu ta representa 37.6 porciento di e gastonan cu un ciudadano tin na Aruba.

Esaki segun informantenan ta un asunto cu mester atende directamente pasobra e ta wordo ocasiona dor di importacion di problemanan di exterior pa Aruba.

“Vivienda ta e problema grandi di Aruba. E problema cu ta sigui crece a base di e importacion di hende na un pais chikito caminda prijs di vivienda ta bira alarmante. E cifranan presenta ta mustra cu mas cu un tercer parti di gastonan di un ciudadano ta pa e por tin un dak riba su cabes,” informantenan a indica.

Manera a wordo splica na DIARIO, aki tin un tarea pa Gobierno cu mester cuminsa controla prijsnan cu ta wordo cobra pa huur di vivienda.

“No por spera cu tur hende ta bay construi nan propio cas cu tambe ta bini cu gastonan grandi cu den crisis ta dificil pa paga.  Gobierno mester mira con ta bay controla prijsnan cu ta wordo pidi pa huur sin cu e edificionan ta hustifica e prijsnan cu ta subi pa competencia di trahadonan importa,” a wordo treci dilanti.

Manera informantenan a insisti, si sigui alimenta e spiraal di inflacion, trahadonan den comercio cu rason ta bay pidi nan parti pasobra mester paga belasting cu lo subi y comercio lo wordo forsa di kita personal.

“Comercio no ta beneficia di e trahado cu ni pa cuminda ta paga suma comparabel pa loke e ta gasta na vivienda,” informantenan a mustra.

E hecho cu trahadonan stranhero ta biba hopi hende den un cas, ta haci cu nan ta bira competencia pa e Arubiano, cu mester paga mas placa na huur.

E medidanan cu Gobierno a tuma aña pasa ta debi directamente na e mal maneho financiero te 2017, ora mester a tuma medida.

Comercio local, cu tambe a sufri den e situacion di Citgo, tambe mester paga mas cu e ta ricibi.

“Aruba mester sinta na mesa pa kibra e inflacion cu Aruba no por paga mas,” informantenan a mustra. E momento a yega pa efectivamente atende problemanan y habri un futuro nobo pa Aruba a base di realidad cu no ta permiti mas accion dirigi riba popularidad politico.

E mensahe ta cla: mas inflacion lo bay causa desempleo den sector priva y publico pasobra Aruba no por tene su cabes riba awa mas.

- Advertisement -

DUNA COMENTARIO

Please enter your comment!
Please enter your name here