ORANJESTAD (AAN) – Mas di 200 mucha wordo invita pa Aruba Symphony Festival Academy, pa presencia un training di orquesta. Asina sr. Johnny Croes, miembro di e directiva di ASFA, a duna di conoce na DIARIO.
Di e manera aki nan a ser conoci cu diferente instrument musical, ademas di a scucha con un orquesta ta sona y pa wordo inspira pa algun dia Aruba por tin su propio orquesta hubenil.
Esaki ta un di e metanan di ASFA y pa logra esey nan ta wordo invita pa wak e training aki, y pa un dia nan tambe por forma parti di Aruba Symphony Festival.
Un di e gruponan cu a wordo invita ta di Hospi Bondi Camp, y hopi di nan ta conoce e sonido di orquesta, door di hopi pelicula cu nan ta wak manera Harry Potter, di super heroes, etc. Pero nan no conoce e repertorio cu nan a scucha cu ta mas clasico. Sr. Croes a subraya cu hopi di nan no a mira un orquesta en bibo.
E orquesta aki ta consisti di 80 musico participante, dirigi pa Simon Gollo, Fundador y Director Artistico di Aruba Symphony Festival.
Sr. Croes a extende un invitacion ha henter pueblo di Aruba pa bin presencia e clausura di e Festival, den Cas di Cultura, Diasabra awo dia 27 di Juli. Ainda tin carchi disponible.
