ORANJESTAD (AAN): Den e siman cu a pasa Parlamentario drs. Mervin Wyatt-Ras a manda preguntanan pa Minister di Salubridad, sr. Dangui Oduber. E preguntanan ta referente su preocupacion entorno irregularidadnan den laboratorio. Dicho laboratorio, antes Landslaboratorium desde mas cu 2 aña a haya un status mas independiente. El a bira un Fundacion cu ta resorta bao di Hospital.
Lider di e sindicato di enfermeronan (ABV) tambe ya caba a expresa preocupacion den prensa y a pidi un investigacion independiente ya cu segun e Hospital no a duna oido na su preocupacionnan. Den medionan di comunicacion e ta puntra su mes di con no a tuma ningun medida contra e manager di laboratorio. Ademas e personal a ser intimida door di e manager.
E minister a anuncia cu lo laga haci un investigacion forensico. Sinembargo ta keda e pregunta cu si tabata sa kico ta pasando di con no a actua preventivo. Aki ta trata testnan importante pa salud di nos hendenan cu laboratorio ta encarga cu man y cu ta tarda pa haya resultado. Tambe tin cuestionamento di e forma con ta trata cu e testnan. Minister tempo e tabata den parlamento tabata pidi pa investiga tur cos y tur hende y bao di su wowonan con ta posibel cu irregularidadnan por sosode.
Pesey mes ta facil pa papia of reclama pero ora cu bo mes tin cu haci e trabao como mandatario esaki ta resulta den practica otro cu a kere.
Wyatt-Ras a puntra ki tempo e investigacion cu minister a anuncia lo cuminsa y cuanto tempo esaki lo tuma. E parlamentario a puntra pa otorga Parlamento e rapport di tal investigacion. A puntra alavez si minister a combersa cu conseho di supervision di Hospital y con e combersacion aki a bay y palabracionnan. Tambe a puntra si e schors e manager y e motibo.
Un otro investigacion cu minister tempo e tabata parlamentario continuamente tabata papia di dje tabata rond di construccion y renovacion di Hospital. Nunca e minister y su partido no a gusta e contratista y critica tur cos cu tin di haber cu Hospital y su renovacion. Mientrastanto ya caba tin mas di 2 aña di gobiernacion y e proyecto di renovacion no a finalisa ni e investigacion cu e minister tanto a papia di dje ora e tabata parlamentario.
Wyatt-Ras ta spera cu e minister no ta bay uza e asunto aki pa bay bula cabez di hende den hospital, pa pone su friends.
Un otro pregunta di Wyatt-Ras ta nombracion di miembronan di Conseho di Supervision cu lo no tabata cla. Hustamente e hunta aki tin control di calidad di Hospital na su encargo y ta necesario cu esaki ta bon regla pa e por haci su trabao di control di maneho di Hospital debidamente. Si esaki no ta bon regla e control lo ta dificil di efectua.
Wyatt-Ras ta spera di haya contesta pronto.
