Home Policial Mesun bendedora cu a bira victima a wordo aresta pa Atraco Team

Mesun bendedora cu a bira victima a wordo aresta pa Atraco Team

903
0
SHARE
- Advertisement -

Diabierna atardi

ORANJESTAD (AAN): E oficialnan hudicial di Atraco Team, a bin ta investigando un caso cu a tuma lugar na luna di Mei 2019 na un oficina di loteria cu tin net na comienzo di Rudolf Arendsstraat na Playa.

E atraco mes a socede dia 10 di Mei 2019, faltando 10 minuut pa 9:00 pm bati, y Polis cu urgencia a acudi na e oficina cu yama “Get Rich Rudolf Arendstraat Lottery” den e caya ey.  E bendedora a bisa Polis cu un homber color scur cu cuchiu grandi a oblige den idioma spaño pa e entrega tur benta di dia.  El a duna descripcion di e homber, cu ta cu jeans preto y tambe keds preto.

Mesora a core notifica tur Polis den area di Playa pa cuminza tira bista.  E bendedora di fam Brito a bisa autoridad cu e homber a bay cu un tas preto, fuera a bay cu como 2.500 Florin for di benta.

Tanto Atraco Team y tambe oficialnan di Slachtofferhulp a yega pa yuda e bendedora, y haci interogacion pa haya sa exactamente kico a pasa.

Sinembargo ta parce cu Atraco Team no a kere mucho den e storia di e bendedora aki.  Asina a start un investigacion cu a sigui pa resto di luna di Mei, y tambe a sigui henter luna di Juni.  Nan a analiza tur angulo di e caso, cu yudanza di security video den e bario.

Oficialnan di Atraco Team a saca un solo conclusion, y cu aprobacion di Ministerio Publico, riba Diabierna 5 di Juli 2019 a subi caya pa bay haci un detencion.

Despues di 56 dia, nan a acudi y yega di sorpresa na e mesun Oficina di Loteria den Rudolf Arendsstraat.  Nan a baha y detene e bendedora, identifica como J.E. Brito di 26 aña di edad.  E muher ta naci na Aruba, y cu man na boei a wordo transporta pa Oficina di Recherche.  Pues un otro persona mester a bin atende e oficina di loteria e momento ey cu a keda sin bendedora.

Vocero Policial a confirma cu esaki ta relaciona cu e caso di atraco cu a tuma lugar casi 2 luna pasa na mesun oficina di loteria.  Segun Lito Lacle di Cuerpo Policial, no ta descarta cu mas detencion lo cay.

El a bisa cu e aresto aki a bin como resultado di un tremendo trabao di Atraco Team.  Claro cu ainda nan ta habri pa cualkier tips, y esaki por pasa via Tipline di Polis na 111-41.

Vocero Policial a bisa, cu e detencion aki di Diabierna atardi, Atraco Team te cu awor a detene 36 sospechoso caba pa 2019.

- Advertisement -

DUNA COMENTARIO

Please enter your comment!
Please enter your name here