ORANJESTAD (AAN)—Den conferencia di prensa, Minister Rudy Lampe, titular di Enseñanza, Ciencia y Desaroyo Sostenible, a splica di kico ta consisti e problema di oranan extra, pa loke ta trata docentenan di scolnan secundario (por ehemplo Colegio), y institutonan manera IPA y Colegio EPI.
E dignatario a splica cu un docente cu ta traha tempo completo ta traha entre 27 y 32 ora incluyendo e “lesuur” y “taakuur”, locual ta suma 40 ora di trabao pa siman.
El a splica cu lesuur ta inclui e ora di les, preparacion y evaluacion di e les, y pesey e ta mas cu un “klokuur” mientras cu un taakuur (ora di tarea) ta tuma 75 minuut.
Minister Lampe a declara cu pa hopi tempo caba ta existi un regla cu no ta por escrito, entre e Departamento di Enseñanza y e directivanan di scol, cu ora tin scarcedad di maestro pa cierto materia (por ehemplo wiskunde) un docente por haya extra ora riba su 32 oranan di les te un maximo di 40 ora. Den e ultimo añanan e regla aki a wordo poni riba papel y e maximo ta 36 ora. Gobierno tambe ta mantene e posibilidad aki ora tin scarcedad di docente pa un materia e por haya permiso pa 4 extra ora, y den caso hopi excepcional cu ta wordo bon hustifica, e por haya 8 extra ora. Pero for di e aña escolar nobo 2019-2020 esaki no ta wordo permiti mas.
E dignatario a splica cu un docente cu ta traha mas cu 40 ora lo mester traha di Dialuna te Diadomingo sin dia di descanso, y esaki por afecta su salud locual por conduci na AO, y esaki na un circulo vicioso peor cu e scarcedad di maestro mes. Pesey, minister Lampe a subraya, no tin cambio den e maneho di overuuren custumbra pero solamente lo coregi e exceso di overuuren.
Otro aspecto cu e mandatario ta coregi ta cu gobierno ta subsidia salario di e directivanan di scol a base di un promedio di 28 alumno pa klas. Esaki no ta algo nobo, pa ley un klas di scol basico por bay te 30 alumno y pa scolnan secundario esaki ta 28 alumno, y den esaki no tin cambio. No ta berdad cu e klasnan ta bay bira mas grandi cu 30 alumno pa klas. Mas bien ta keda existi klasnan mas chikito den e sistema regular di educacion.
E maneho nobo no ta kita e posibilidad cu un maestro por duna les anochi na un otro centro educativo (manera EPE) pero solamente cu esey no ta conta como extra ora sino como oranan los, despues di cumpli cu e tempo completo di trabao full time. E docente ta liber pa dicidi con e ta organiza su tempo liber y por scoge pa duna les na otro instancia den su tempo liber.
Minister Lampe a agrega cu e maneho nobo ta stimula e docente pa bay bek na su “core business” pues duna les. El a splica cu si na e momentonan aki un docente tin por ehemplo 20 lesuur y 12 taakuur y ta forma un VB (volledige betrekking) lo reduci su taakuur na cuater y e lo tin 28 lesuur.
“Placa di pueblo ta sagrado y uso di placa di pueblo mester ta eficiente y efectivo. Y semper Ministerio di Enseñanza ta habri pa papia cu e sindicatonan pa yega na un manera sostenible pa e pueblo cu ta paga y cu ta den cuadro di e ley di presupuesto”, Minister Rudy Lampe a conclui.
