“E 20 miyon necesario no tey”
ORANJESTAD (AAN) – Den e ronda di pregunta, durante e conferencia di prensa Diahuebs, den cual Minister di Finanzas y Economia mr. Xiomara Ruiz-Maduro a elabora tocante e demanda di empleadonan publico, sosteni pa SEPPA, tocante indexering.
E mandatario a declara cu enfasis cu no tin placa pa paga indexering den e situacion financiero-economico dificil cu Aruba ta confrontando.
E dignatario a desmenti cu e sindicato a manda carta na gobierno y no a haya contesta. Minister Ruiz Maduro a menciona cu el a reuni cu e sindicato cuater biaha, aunke den silencio.
Esaki pasobra ora ta hiba combersacion tocante indexering ora informacion ta bay den prensa tur hende ta join cu e asunto aki, y crea un ambiente innecesario cu ta stroba e trankilidad den cual e combersacion ta wordo hiba.
El a confirma cu durante reunion a bin dilanti e peticion di e sindicato, den cual nan ta menciona nan deseo di un indexering di 3.6%.
“A wordo indica na nan cu cada porciento cu nan ta pidi ta costa pais Aruba 6.6 miyon florin, pues e peticion aki ta mas cu 20 miyon pa cumpli cune, y ta 20 miyon cu na e momentonan aki, lamentablemente pais Aruba no tin!” Minister Ruiz-Maduro a acentua.
El a sigui bisa cu Gobierno, como dunador di trabao, den e situacion financiero cu nos pais ta confronta, claramente kier cumpli cu e trahadornan, pero di otro banda como Gobierno, e tin cu cumpli cu henter e pais.
E ora ey gobierno no ta solamente dunador di trabao di empleadonan publico, pero e tin henter e gobernacion di e pais den su man, y na e momentonan aki Aruba tin un situacion financiero cu ta precario y bao supervision financiero di Reino, unda cu tin un protocol cera di November 2018, cu ta trece cune desde 2019 bay dilanti, cierto puntonan maximo na locual mester tin di gastonan di personal, di 479 miyon florin.
Pero hunto cune, tambe tin algun regla presupuestario di cual, por ehemplo si kier bin cu gastonan adicional, por ehemplo di indexering cu ta un suma di mas di 20 miyon, mester baha e plafond di e 479 miyon ey pa por paga e 20 miyon na indexering.
Minister Ruiz-Maduro a señala cu e situacion na Venezuela ya caba ta treciendo gastonan extra caba na overtime, y e 479 miyon aki ta bao di presion. E ora ey no por bisa cu djis por bay over na paga indexering, pasobra e placa ey no tin. Ademas tin otro riesgonan manera di AZV, aunke e riesgo aki a wordo mengua na e momentonan aki, pero ora cu a sinta cu e sindicato y a mustra nan cu na AZV so tin 24.9 miyon extra cu mester a bin acerca, y banda di esey tin otro placa cu ta mustra cu gobierno no lo haye, loke tambe ta trece otro presion cune.
