Director di DOW, Marlon Croes: Deadline ta acercando
ORANJESTAD (AAN): Director di DOW, Ing. Marlon Croes, a duna un update pa loke ta e proyecto Watty Vos Boulevard. El a bisa cu esaki ta un proyecto grandi cu ta wordo ehecuta door di e compania Mota Engil.
Den e proceso a haya hopi critica. A indica cu den e caso aki Mota ta esun responsabel pa e ceramento di caminda y DOW pa controla e proyecto.
Segun Croes, na fin di 2018, Mota tabata kier haci e cruzada na altura di Ling & Sons pa dia 7 di December y habri bek fin di Januari. Esaki tabata un periodo di aña hopi druk y DOW ta keda para ariba cu no ta cera e caminda ey pa no afecta comercio den e area ni e bishitantenan.
E tipo di decisionnan aki ta trece cune tambe un retraso den e timeline di e proyecto, a indica.
Den luna di Juni a haci un trabao grandi na e rotonde di Hospital entre e rotonde di Superfood unda mester a caba cu e ultimo capa y mester a cera esaki den fasenan pa asina por a caba di asfalta completo.
Esey a trece basta critica y keho ariba e proceso, pero aworaki cu ta cla por wak cu ta core mas mihor, a splica.
Si tabata pa Mota, nan lo a cera e caminda for di Sun Plaza den un solo biaha y traha ariba e caminda aki. DOW a bisa no pasobra trafico mester por sigui circula y Hospital, hotelnan mester keda accesibel. Esey kiermen cu tin cu traha den dos fase.
DOW ta purba di guia e trabao y tene trafico circula, Croes a enfatiza.
Den e proceso ey ta menciona ariba schedule cu dia 16 di Augustus ta bay caba cu practicamente tur cos, pero tin basta trabao ta tuma lugar.
Diadomingo mainta, por ehemplo, a cera e rotonde number dos, na altura di ex Codemsa na Cumana y e trabaonan ta tumando lugar pa habri diahuebs merdia. Pa esaki tuma lugar a condiciona e compania pa habri e caminda di Meiveld, unda tin e overpass. Si esaki no a sosode lo a hinca den un problema fastioso cu fluho di trafico, Marlon Croes a splica.
Tambe, a bisa, diasabra, mester a drecha e caminda di santo patras di Aurora Funeral Home pa asina e fluho di trafico por sigui eybanda den ambos direccion for di Santa Cruz direccion aeropuerto.
Ta purbando di haci e trabaonan grandi cu por trece problema den trafico ora scol habri aki tres siman, e director di DOW.
Net pa ora scol habri e contratista kier tin e proyecto completamente cla. Relaciona cu esaki Croes tin su reserva ariba dje. Banda di e trabaonan fisico, tambe tin trabaonan administrativo pa cumpli cune.
A agrega cu un ingeniero independiente tin cu haci e auditorianan necesario pa bisa cu tur cos ta ok y cu por otorga na Mota-Engil e ciere di e proyecto. E proceso di auditoria y di haya e raportnan tambe ta tuma su tempo.
Marlon Croes a agrega cu DOW a haci su observacionnan caba. Ta core a base diario pa controla y sinta wak e puntonan debil. Ta informa e contratista pa e tin tempo pa drech’e. Esey e ingeniero independiente, cu tabata dos siman na Aruba, a haci tambe.
