Home Religion y Espiritualidad Muchanan a pinta Santa Filomena den cuadro di aña di hubileo di...

Muchanan a pinta Santa Filomena den cuadro di aña di hubileo di parokia

22
0
SHARE
- Advertisement -

ORANJESTAD (AAN): Diahuebs 4 di juli ultimo  a organiza en conexion cu 70 aña di Parokia Santa Filomena un concurso di pintamento di Santa Filomena bao di e schoolnan di Paradera cu a hiba e titulo ‘Ban pinta Santa Filomena’.

E scolnan cu a participa ta Scol Preparatorio Nos Paraiso, Maria Goretti College y Colegio Pastoor Kranwinkel. E pintamento a tuma luga na e scolnan mes entre 4 pa 20 di juni ultimo.

Diahuebs 4 di juni  pa 8:30 di mainta tabata tin celebracion di Santo Sacrificio di Misa na misa Santa Filomena na Paradera, en conexion cu e ocasion aki y tambe e ceramento di aña escolar 2018-2019 pa gradici Dios pa e aña escolar cu a caba di pasa.

Despues di e Santo Sacrificio di Misa a sigui cu e exposicion di e pinturanan den Centro Caiquetio. E scolnan participante a bishita e exposicion di e pinturanan segun un programa.

Na yegada di e alumnonan na Centro Caiquetio: miembronan di e Team Organizado a yama e alumno- y maestronan bon bini na porta y alavez a invita nan pa pasa den e sala pa admira e pinturanan. E alumnonan enberdad a haci nan best y nan a pinta hopi bunita. Despues di esey, nan a pasa pafo, aki un otro miembro di e Team Organizado a saluda y yama nan danki pa nan participacion na e concurso di e pintamento. A conta nan un storia cortico tocante  e bida di Santa Filomena, e muchanan a scucha cu hopi atencion.

Na final a haci entrega na e cabesantenan di e scolnan un regalo como recuerdo di 70 aña di  Parokia. Cada scol a ricibi un buki di catisashi na Papiamento y for di cada scol a saca un nomber for di tombola, kende a gana un cadobon pa su participacion na e concurso.

Tambe palabra di  gradicimento a bay na e alumno-, maestronan pa nan participacion.

E Comision Organizado por a observa con e alumnonan tabata admira y papia cu otro tocante e pinturanan. Tabata hopi bunita pa admira e pinturanan di e scolnan hunto den un exposicion den Centro Caiquetio.

E team kier a gradici e sirbidornan di Misa y pastor Juancho Pilongo, kende a celebra e Misa, y tur cu a yuda pa prepara y promove e actividad; tambe esnan cu a yuda riba e dia mes di exposicion na Centro Caiquetio.

 

- Advertisement -

DUNA COMENTARIO

Please enter your comment!
Please enter your name here