Home Gobierno Negoshi di ‘ontheffing’ a daña pa hopi hende local haya trabao

Negoshi di ‘ontheffing’ a daña pa hopi hende local haya trabao

38
0
SHARE
- Advertisement -

Prome Minister Evelyn Wever-Croes:

ORANJESTAD (AAN):  Durante un conferencia di prensa extraordinario cu Gobierno di Aruba a yama diamars atardi, Prome Minister Evelyn Wever-Croes hunto cu Ministernan Glenbert Croes y Xiomara Ruiz-Maduro, a comparti un noticia cu ta regarda desempleo aki na Aruba.

Gabinete Wever-Croes no a haya e situacion social, economico, financiero y laboral di pais aki na ordo, pa motibo di principio a pidi pueblo un tiki pasenshi prome cu cuminsa mira tur resultado di e maneho di Gabinete Wever-Croes. Y awe, un biaha mas, nos ta mira bou di e maneho riguroso di Gobierno di Aruba dirigi riba crea cuponan di trabou y pa percura cu nos hendenan local haya trabou, nos ta mira resultadonan positivo pa nos pueblo. E cifra di desempleo a baha pa loke ta trata aña 2018.

Den e rapport di AKO (Aanbieding Resultaten Arbeidskrachtenonderzoek), cu a wordo conduci door di Directie Arbeid en Onderzoek (DAO), den colaboracion cu CBS y CBA cu recientemente a wordo emiti, por realisa con e resultadonan di e ‘onderzoek’ di cifranan di desempleo ta actualmente.

E cifra di desempleo na aña 2017, bou di e gobierno anterior, tabata na 8.9% y na 2018, bou di Gabinete Wever-Croes, esaki a baha na 7.3%. Un aspecto den esaki hopi importante pa menciona ta e desempleo den nos hobennan cu semper tabata un cifra hopi halto. Na aña 2017, e cifra di desempleo bou di nos hobennan tabata 19.4%. Danki na e esfuersonan haci durante e ultimo lunanan pa crea cupo di trabou pa nos hobennan, esaki a baha den 2018 pa 16.2%.

Maneho economico di Gabinete Wever-Croes ta dirigi no ta pa crece economia riba su mes sino riba crea cuponan di trabou y awo cu e rapport di AKO a keda emiti, nos por mira e resultado di e maneho aki traduci den cifranan.

Prome Minister ta gradici tur Minister di Gabinete Wever-Croes y especialmente Minister di Labor Glenbert Croes y Minister di Economia Xiomara Ruiz-Maduro mencionando cu e resultadonan aki no ta algo cu a cay for di cielo sino resultado di trabaonan minuciosamente dirigi y monitoria constantemente. Cifranan ta resultadonan di plannan economico di Gobierno y di e maneho di Minister Croes riba e tereno di labor. Cambionan den Departamento di Labor, den DPL cu su slogan di semper “Empleo na Aruba pa nos hendenan local prome”. Apesar di no tawata facil y cu hopi reto cu tabata tin y lo sigui bin, aworaki Aruba por mira frutanan di e bon maneho aki cu ta duna forsa pa sigui padilanti.

“E maneho di Minister Glenbert Croes, tabata un maneho cu e pueblo Arubano den curason y mente. E maneho di e Minister anterior di Labor cu su negoshi di ontheffing a daña pa hopi hende local haya trabao. Esaki a crea mas desempleo pa Aruba.

Cu e maneho di Minister Croes riba realmente crea cupo di empleo pa nos hendenan local, a duna awe resultadonan positivo! Desempleo na Aruba a baha di 8.9% (2017) pa 7.3% (2018). E cifra specifico di desempleo entre hobennan a baha di 19.4% pa 16.2%. Den 2018, 1048 persona cu tabata desemplea a haya trabou”, Prome Minister Evelyn Wever-Croes a duna di conoce.

- Advertisement -

DUNA COMENTARIO

Please enter your comment!
Please enter your name here