Home Hudicial No tin motibo valido pa retira e 5 miembronan di Raad van...

No tin motibo valido pa retira e 5 miembronan di Raad van Toezicht di Lotto pa Deporte

242
0
SHARE
- Advertisement -

Hues ta bati riba dede di Minister

ORANJESTAD (AAN): Diaranzon mainta Corte di Husticia a dicta sentencia den e caso mas profundo cu Gobierno di Aruba a cuminsa contra Fundacion Lotto pa Deporte (FLPD) y e miembronan di e Raad van Toezicht: S.J., B.d S.,A.K., F.F. y E.K.

Ta asina cu e Hues basicamente a confirma e decision tuma pa e Hues den e caso sumario cu anterior Gobierno a cuminsa pa kita e miembronan di Raad van Toezicht y laga esnan cu e Gobierno a nombra tuma lugar. Hues ta haya cu no tin motibo valido pa e retiro y ta haya cu e minister a haci mal uso di su autoridad cy articulo 8 lid 2 di e statutonan di FLPD ta dun’e.

    PONE FIN NA NOMBRAMENTO POLITICO:

E caso aki ta data di Maart 2081 ora a cuminsa cu e caso mas profundo, despues cu Hues di Corte den Promer Instancia den e caso sumario a dicidi cu Gobierno no por duna retiro ya cu no tin motibo valido.

Hues ta haya cu e miembronan di Raad van Toezicht mester keda y cu esnan cu a worde nombra nobo, tin cu destrui e decision ey. Hues cu e decision aki, kier pone un fin na e nombramento politico cu mas bien ta un cultura aki na Aruba caminda cada biaha cu un Gobierno nobo sinta, esnan afilia na e patidonan den Gobierno ta haya funcionnan di confianza.

Den pasado caba, un Hues a yega di hala atencion di Gobierno cu gobernacion ta un continuidad y no por ta asina cu cada biaha cu un Gobierno nobo sinta ta bin cu nombramentonan politico.

   EVALUACION:

E sentencia di Diaranzon mainta ta hopi largo. Hues a dedica 19 pagina na e sentencia y DIARIO ta trece un resumen pa nos lectornan por compronde.

Hues ta mustra cu e miembronan di Raad van Toezicht (Raad) di FLPD ta haya cu e minister no tin base valido pa 3 Januari 2018 a tuma e decision cu e miembronan di Raad mester tuma nan retiro. E miembronan di Raad ta pidi Hues pa destrui e decision di minister di 10 Januari 2018 pa nombra miembronan nobo pa e Raad van Toezicht.

Di parti di Gobierno ta worde mustra cu FLPD ta un fundacion di Gobierno y como tal e minister encarga, tin e autoridad pa nombra y retira e miembronan di Raad cu e kier. Esey ta trece cun’e cu e decision tuma pa e minister pa cu e miembronan di Raad ta na cu lugar. Di parti di Gobierno a mustra cu na 2009, e Gobierno nobo cu a sinta a pidi e miembronan di Raad di e tempo ey pa tuma nan retiro, cual a sosode tambe.

Gobierno ta haya cu no por bira rond di e realidad politico na Aruba cu personanan afilia na e partidonan politico cu ta na manda, ta haya funcion di confianza.

    NO TIN MOTIBO VALIDO PA RETIRO:

Hues ta mustra den su sentencia cu Gobierno no por mustra cu no tin un bon relacion di cooperacion cu e miembronan di Raad y cu e miembronan di Raad lo ta stroba esaki.

Hues ta haya cu loke por compronde di henter e caso ta cu ta e minister, ta esun cu ta stroba e relacion di cooperacion entre e dos partidonan.

Hues ta haya cu e minister a duna retiro sin cu tin motibo valido pa esaki.

   MAL USO DI AUTORIDAD:

Hues ta mustra cu e minister a haci mal uso si e autoridad cu articulo 8 lid 2 di e statutonan di FLPD ta dun’e.

Hues a bisa cu e ta destrui e carta di retiro di 3 Januari 2018 di e 5 miembronan di Raad ya cu na opinion di Hues e nombramento di e 5 miembronan nobo di Raad no ta na su lugar y ta contra articulo 8 lid 1 di e statutonan di FLPD.

    SENTENCIA:

Hues su decision ta cu e ta destrui e retiro di 3 Januari 2018 di e 5 miembronan di Raad. Hues ta destrui e nombramento di 10 Januari 2018 di e 5 miembronan di Raad nobo. Hues ta ordena Gobierno pa paga e gastonan di e caso.

- Advertisement -

DUNA COMENTARIO

Please enter your comment!
Please enter your name here