Situacion ta tenso na Prison di KIA
ORANJESTAD (AAN): E hefe nobo di KIA (Korectie Instituut Aruba) señor Winklaar, kende recien a wordo nombra pa e puesto, a haye confronta cu un situacion serio cual a tuma lugar Diahuebs mainta den KIA.
Tanto Polis, Recherche ambulans a worde dirigi cu urgencia debi pelea formal a tuma lugar den e cuater muraya den KIA. Pa algun tempo caba lo tin rumornan lo ta circula cu situacion den e KIA ta cerca di explota debi cu bao di prisonnan lo tin problema serio.
Kico exacto tin tras di e problema cu a explota den bringamento y hincamento formal, no ta conoci, pero aparentemente e pleito ta entre grupo di preso cu otro.
DIARIO a haya informacion cu e pleito tabata entre un tal Steve y un tal Jason kendenan ta encarcela.
Den pasado, a yega di socede cu Steve a perde su tata, debi cu el a wordo asesina pa e tal Jason aki. El a haya castigo di prison y a keda encarcela.
Pero awor a presenta e situacion cu Steve tambe ta den prison. Y aparentemente pa algun siman caba tin tiramento di palabra ta andando.
Esaki a desemboca den un pelea riba Diahuebs. Cu un obheto skerpi aparentemente traha den KIA mes, e tal Steve aki finalmente a tuma venganza pa morto di su tata, y a bringa y a laga Jason basta mal herida na un banda di su cara. Tin informacion cu un pida di su orea a wordo kita. Como cu autoridad no a suministra informe, y pa colmo sistema di computer di Polis tabata down riba Diahuebs, no por a haya confirmacion.
Hecho si ta cu e preso herida a wordo saca di prison y hiba cu urgencia pa Hospital. No ta conoci si acaso e pida orea a wordo haya, y si nan a hibe pa check si acaso Docter y Ciruhano por pege bek.
No ta conoci tampoco si e preso a keda interna na Hospital, pasobra ta conoci cu ultimo añanan na Hospital no ta hopi “man habri” pa laga presonan keda interna 1 of mas dia eynan.
Tin chens pues cu despues di a cose e heridanan, e preso lo a bay bek pa Prison di KIA.
Hecho ta cu e Director nobo lo tin basta dolor di cabez pa cu e detenidonan y alavez pa e status di e personal rond di dje cu ta frusta di e situacion cu nan tin cu labora. Mas ainda presonan mes no tin seguridad pa ta sera den KIA.
Enberdad nan tin cu sinta nan castigo pero no por ta asina pa sea frustracion hacimento redashi bashamento abao riba otro a crea tension.
Preso mester rehabilita pa ora e bandona e cuater murayanan despues di sin ta su castigo pa drenta comunidad y aporta pa haya trabao pa mantene su famia.
