Home Cultura Presentacion oficial di e buki “Aruba en een keuze uit haar Toponiemen”...

Presentacion oficial di e buki “Aruba en een keuze uit haar Toponiemen” na Biblioteca Nacional

78
0
SHARE
- Advertisement -

ORANJESTAD (AAN): Nombernan di luganan na Aruba manera ‘Cudarebe’, ‘Marawiel’, ‘Macuarima’, y ‘Hudishibana’, di unda nan ta bin? Cua ta nan origen? Dicon nan yama asina? E famoso filosofo Griego, Aristoteles, a yega di bisa ‘Duda ta e comienso di tur sabiduria’.

Diez aña pasa, duda den tur e storianan y leyendanan cu ta core rond ariba e origen di e nombernan di luga na Aruba, a conduci cu Ing. Vivienno L. Frank, ex-hefe di Kadaster kantoor na Aruba, a embarca den un odisea pa decifra hopi di e enigmanan cu tabata tin tocante e origen di e toponimonan Arubiano.

Un aventura cu a dura diez aña y cu a hib’e ta consulta hopi documento y mapa antiguo, y cu a desenmascara hopi leyenda bieu y alavez a pone cu mitologianan nobo a mira luz di dia como ‘posibel berdadnan’. Berdad ta cu nan tabata mara wiel na Marawiel… pero no e forma cu folklore local ta relata.

Mayoria hende na Aruba sa cu ‘Hudishibana’ y ‘Cudarebe’ tin nan origen den lenga indjan antiguo, pero cua idioma y kico nan traduccion ta na Papiamento, ta un di e topiconan central di e buki.

Cu Macuarima ta bin di un nomber di un princesa indjan? No segun Ing. Frank, kende ta manda e storia aki p’e mundo di fantasia di un conocido escritor Arubiano, y ta argumenta e posibel berdadero origen di e nomber.

Diamars pasa na Biblioteca Nacional Aruba na George Madurostraat 13, a tuma lugar presentacion di buki Aruba en een keuze uit haar Toponiemen, na unda Ing. Vivienno “Vi” Frank a presenta personalmente su buki y splica entre otro kico ta e diferencia entre un toponimo (toponiem na Hulandes) y un nomber cu ta core den boca di pueblo.

Un buki cu ta encera diez aña di trabou y cu ta trata origen di nomber di casi 300 luga aki na Aruba.

 

- Advertisement -

DUNA COMENTARIO

Please enter your comment!
Please enter your name here