Home Parlamento Rudy Richardson (MEP) mustrando “Nos libertad prome cu cualkier partido politico”

Rudy Richardson (MEP) mustrando “Nos libertad prome cu cualkier partido politico”

33
0
SHARE
- Advertisement -

ORANJESTAD (AAN): Mirando cu nos tin desaroyonan sumamente preocupante den Reino Hulandes, ta importante pa nos digno pueblo sa e retonan cu nos ta bibando aden politicamente.

Ora cu partido AVP a drenta den gobernacion Arubano na 2009 no tabata tin problema algun cu nos libertad y nos posicion den Reino Hulandes. Locual tabata existi e tempo ey tabata un democracia bibo y un pueblo gosando di full su libertad constitucional.

Ta despues di 2014 Aruba a perde su derecho di autodeterminacion bao di Gabinete Mike Eman II. Ta na 2013 ora cu e partido a worde reeligi Gobierno di Reino a duna e gabinete na 2014 un “aanwijzing” pa investiga nos presupuesto nacional atrabes di nos insituto di Gobernador. Nos tur por corda e show di Ensure cu Sr. Eman a hiba e tempo ey pa nada menos di un siman largo sin resultado.

Despues di tanto manipulacion cu nos presupuestonan no tabata tin otro alternativa y a usa nos Statuut y Reglement voor de Gouvernuer pa para Gabinete Mike Eman su mal maneho. Pa tristo cu esaki por zona, e mal maneho no a stop ey y a sigui te cu eleccion di 2017 unda nos pueblo a logra cambia signatura di gobernacion cu awe nos tin Gabinete Wever Croes, un gobierno di coalicion di partidonan MEP/POR/RED.

    Presente:

Awe nos ta den pleno lucha pa salba nos pais di e decadencia cu Gabinete Eman a lag’e na 2017. Nos tin un debe nacional pafor di normanan Europeo y nos tin tantisimo problema economico, financiero y social pero cu e recursonan limita Gabinete Wever Croes ta gobernando cu optimismo.

Democracia tin cu cana su caminda y nos por tuma nota cu partido AVP y nan lider pafo di parlamento, cu a orchestra tur nos problemanan nacional keto bay ta hiba oposicion manera nan no ta e partido cu a goberna Aruba desde 2009 te 2017. Partido AVP a sali di gobernacion lagando Aruba pa prome biaha den nos historia bao curatela y limitacion di nos libertad universal atrabes di e ley di Caft unda cu a silencia parlamento di Aruba por completo, cu ta e organo mas halto di nos constitucion representando e digno pueblo di Aruba su libertad door di eleccion liber y democractico.

Gabinete Wever Croes a logra pa frena nos debe nacional y tambe reduci nos deficitnan astronomico cu tabata conoci pa e Gabinete anterior. Pero esaki no a bin sin su consecuencianan pa nos pueblo. Nos tin 81 miyon pa aña pa e proximo 20 añanan pa paga pa proyectonan di infrastructura cu keto bay tin meerwerk riba nan. Hospital so nos tin mas di 100 miyon na meerwerk pa no papia mes di e otro proyectonan cu e partido berde a laga atras. Ta te na 2040 cu un crecemento economico anual di 3% nos por yega back na finanzas publico sostenibel. No tin niun proyecto cu ta trece Return On Investment (ROI), al contrario un bes e proyectonan caba ni empleo nan no ta produci mas, pero un debe astronomico cu un economia cu no ta crece pa varios aña caba. Un refineria cera y tantisimo casonan pa investiga ‘only time will tell’.

   Futuro:

Mirando cu nos pais ta den pleno decolonisacion nos no por permiti pa cay back den colonialismo den pleno siglo 21, nos libertador efm Betico Croes a lucha mucho duro pa nos logra nos Status Aparte y libertad constitucional den Reino Hulandes. Cambionan na 2010 den Reino ta mustra cu Aruba semper tabata sa con pa lucha pa su libertad y nos no kier niun poder bin domina nos libertad universal.

Nos por wak desaroynan sumamente negativo den cierto paisnan autonomo y/of den BES di Reino Hulandes. Nos no por bay mas atras den nos derecho di autodeteminacion cu ta un derecho sagrado di cada pueblo, p’esey partido AVP no por bin back hamas den gobernacion Arubano. Mi ta cita di nos libertador Gilberto François Croes: ” E potencial colonial di mas grandi cu tin, no ta e pais cu tin colonianan, sino e pais cu kier deshaci di su colonianan obligando nan di acepta un structura estatal contra e deseo di e  pueblo!

 

- Advertisement -

DUNA COMENTARIO

Please enter your comment!
Please enter your name here