ORANJESTAD (AAN): Vocero di Serlimar, Twyma van der Biezen a bisa den entrevista cu DIARIO cu nan a caba di ricibi 1400 bari nobo pa uzo residencial, di 240 liter, cu lo bay wordo reparti entrante e siman aki.
El a bisa cu tur e barinan kibra lo wordo reemplaza. Ta cuminza cu esnan cu tin e barinan mas kibra y pa esaki ta bay tin ploegnan disponibel cu ta bay haci e reparticion pronto.
Ta rekeri tur esnan cu mester di un bari pa tuma contacto cu Serlimar. Ya caba tin ploegnan cu ta bezig ta wak na e diferente casnan unda tin barinan pa reemplaza. Ta prefera tog pa e clientenan tuma contacto cu 524-5080.
E registracion mester bay via Help Desk pa asina por yega na un lista concreto. Esnan cu a yama caba, mayoria di nan a haya un bari. Pero tin un lista actual cu unda tin adresnan dobel di personanan cu a yama mas cu un biaha.
Ta rekeri awor pa tur esnan cu ta pendiente pa un bari nobo, e ora ey pa tuma contacto cu Serlimar, a indica.
Esnan cu kier ricibi un bari nobo, Serlimar ta bay wak den nan profile nan datonan di cliente pa asina percura cu di berdad ta cliente y ta pagando optimalmente pa asina nan por ricibi nan barinan nobo, Van der Biezen a splica. Esaki conforme e leynan cu ta existi actualmente y cu ta back up e parti di tarifa residencial.
Esnan cu no a paga ainda por pasa Serlimar, check nan balans, check kico por haci y ta flexibel. E ora lo percura pa e cliente ricibi e bari nobo, a subraya.
Pa loke ta kico por benta afo den e bari di sushi, a bisa cu nan a reparti 40 mil flyer caminda ta stipula kico tur ta e materialnan cu ta aceptabel den e mini container residencial.
Por ehempel, bestia morto, desperdicionan kimico manera asbest, desperdicio medicinal, material di construccion, no por tira den e mini container, a enfatiza.
Ta bay keda concientiza e pueblo ariba kico tur mag di bay den e container y pa asina tambe nan por cuida nan container un tiki mas, a agrega.
E vocero di Serlimar a continua bisando cu e clientenan cu nan bari di sushi no ta kibra, ta wak prome kico ta e prioridadnan. Tin hende cu ta cuida nan barinan y esaki por warda un tiki mas te ora cu Serlimar haya e cargamento grandi di containernan.
