Home Comentario “Sin duna mi chens pa baha chofer a ranca bay cu consecuencia...

“Sin duna mi chens pa baha chofer a ranca bay cu consecuencia pa mi”

35
0
SHARE
- Advertisement -

Pasahero: Algun chofer di Arubus mester paga mas tino:

ORANJESTAD (AAN) — E articulo aki solamente tin un meta, esaki e pasahero cu a haya su mes confronta cu un caida mahos ora a baha for di Arubus, a bisa na nos redaccion y loke e ta desea ta pa esaki no bolbe sosode cu ningun otro pasahero.

“Mi ta spera cu gerencia di Arubus por papia cu su chofernan pa nan paga bon tino y sigura di no sigui core prome cu un pasahero a baha full di e bus. Pa nan tin djis un tiki mas pasenshi”.

Kico a sosode:

Dia 18 di Juni pa 12.30 merdia, un dama usuario a subi un bus di Arubus bayendo e ruta di hotel, y pa 12.35 el a yega AZV, unda e mester a baha. E dama a primi bell y prome cune su yiu a baha pa yude, pasobra e tin un rudia ortopedico y door di esey e ta lento pa subi y baha di bus y esaki ta un di e busnan cu tin e trapinan masha halto mes.

Ora e yiu a extende su man pa su mama gara di dje y el a cuminza baha el a keda cu un pia na aire pasobra e chofer a ranca bay sin dune chens pa caba di baha. E dama a perde ekilibrio y tabata dificil pa su yiu gare sin evita cu el a cay.

Dos persona den un auto particular cu tabata core tras di e bus aki, a stop y baha pa yuda lanta e dama, y e ora ey e chofer tambe a stop y baha bin yuda.

Den casonan asina e chofer mester a yama ambulance, polis y Arubus pero e no a hacie. Esaki ta deber di tur chofer di Arubus cu pasa den un circunstancia asina. Por corda e caso mas cu tres aña pasa cu un señora a cay bahando di e bus pero no pasobra e chofer a sigui core sino pasobra e mes a baha mal, cay y a haya un lesion. E chofer Joselito mesora a para, bin yuda e dama cu hopi amabilidad, yama polis y ambulance y tambe su trabao. E no a move te ora e dama a bay cu ambulance y cu el a duna tur tres instancia tur e informacion rekeri.

Den e caso aki unda e chofer a bisa e señora cu e no por warda mas, cu e tin cu bay y a sigui su caminda tambe.

Cu ayudo di su yiu y di e otro dos personanan e señora a bay eerste hulp unda a wordo atendi pa un docter, cu por cierto ta un tremendo specialista.

Consecuencia:

E señora su braza banda drechi a “los” y haya un hematoma grandi bao di su braza. Ainda e tine, DIARIO no a saca su potret ora e dama a papia cu nos, pasobra e ta prefera pa su nomber no bin den corant. E solamente kier pa algo no pasa cu otro hende. Diahuebs, nos a yama su cas puntra pe, y den man di e docter e ta recuperando di e lesion, danki Dios.

Keho na Arubus:

E dama a bay duna keho na Arubus. Un alto funcionario di e compania a djis bise cu ohala e recupera pronto pero cu nan sa cu AZV ta paga pa tur cos, y solamente si tin consecuencia mas serio, cu AZV no ta cubri nan ta paga. Y a bise cu e mester duna danki cu nada mas grave a pasa cune, manera dal den su cabes “lubidando cu e falta ta sinta na e chofer” e señora a indica.

Pasahero asegura?

Ta suppose cu tur pasahero di transporte publico cu tin permiso pa opera, ta asegura den e bus y si algo pasa paden of pafo pa motibo di faya di e bus of door di e chofer mes Arubus ta responsable. Pesey e lucha cu tin contra transporte pirata, pasobra no tin seguro.

Sin generaliza:

DIARIO semper ta para tras di e necesidadnan cu e chofernan di Arubus y usuarionan tin, di core den bus mas confortable, cu airco, y pa e usuarionan trapinan mas abao ta vital mas pa personanan cu tin dificultad pa subi y baha trapi.

Logicamente no por generaliza. Cosnan asina no ta di tur dia, ni cu mayoria di chofer, pero si tin algun cu ta menos cuidadoso y esaki diferente usuario mes ta critica. Ban spera berdad un caso asina no bolbe pasa.

- Advertisement -

DUNA COMENTARIO

Please enter your comment!
Please enter your name here