Home Transporte y Utilidadnan Spaña: No por stuur auto y manda voicenote cu Whatsapp

Spaña: No por stuur auto y manda voicenote cu Whatsapp

192
0
SHARE
— No por stuur cu slof of zapato di hilchi bisti tampoco!
- Advertisement -

ORANJESTAD (AAN): Esnan cu ta bayendo Europa pa asina bishita Spaña, lo ta necesario pa nan haya sa cu reglamento di trafico na e pais ey ta hopi estricto mes.  Tanto e chauffeur como tambe pasaheronan tin di atene nan mes na dje, sino bo por haya multa hopi halto.

Y como cu bo ta turista, ora bo haya un multa, e tin di wordo paga inmediatamente.

Na Spaña, ta Guardia Civil Tráfico ta controla extra mas hopi riba caminda pa asina observa hendenan cu ta bebe di mas, of cu ta maneha bao influencia di droga.  Tambe ta check si papelnan ta na ordo, y si autonan ta gekeur.

Pa colmo, tin algun habitante di Spaña mes cu no sa algun di e reglanan di trafico aki.  Pesey turistanan mester ta extra mas cauteloso.

   No core auto cu slof ni zapato di hilchi:

Reglamento di trafico na Spaña ta subraya cu bo no por core auto mientras cu bo tin djis un slof (flip-flop), of zapato di hilchi bisti.  Pa esey bo por haya un boet di 80 euro (como 161 Florin).  Reglamento ta bisa cu bo zapato mester ta cera parti patras di bo pia, y banda dilanti no mester ta habri tampoco pa evita cu pedalnan di throttle of di brake ta keda pega.

Spaña tampoco  no ta permiti pa bo core auto mientras bo pia ta abao.  Bo mester tin zapato normal of keds bisti.

   No core auto sin shirt:

Tambe e maneho di auto sin shirt (of topless pa chauffeur femenino) ta castigable cu multa entre 40 y 80 euro.  E motibo pa esaki ta cu e contacto cu e lomba di asiento y e safety belt por ta doloroso, y cu esaki por causa herida na e cuero cu chens pa haya golpi.  Tambe den caso cu e airbag activa den un accident, esaki por ta peligroso si acaso bo no tin shirt bisti.

Chauffeurnan tampoco no mag di maneha y come ice-cream, un sandwich, ni bebe awa, tampoco pone makeup.  Tur accion pa kita atencion tras di stuur ta castigable, y por haya multa te cu 200 euro (403 Florin).

   Colga braza pafo di bentana:

Chauffeurnan cu wordo gara ta core cu un braza ta colga for di e bentana, of ta leun riba e porta mientras bentana ta habri, lo por haya un multa te cu 80 euro.  Spaña ta exigi pa semper bo tin tur dos man poni riba stuurwiel.

Pasaheronan sinta na banda, tambe tin di atene nan mes na regla.  Nan no mag di pone pia riba dashboard.  Esaki ta debi na seguridad, pasobra si acaso e airbag activa, e por kibra bo pianan.  Aki bo por haya un boet di 100 euro (201 Florin) pa pone pia riba dashboard.

Si bo tribi di benta un cabito di cigaria for di bo auto, esaki lo produci un multa pisa di 400 euro (809 Florin)

Tambe bo por haya multa si bo core cu mas di 7 hende den auto normal, of cu bo ta programando bo GPS of e pantaya di Car-Stereo ora di ta manehando.

   No mag manda voicenote:

Haci yamada mientras bo ta den auto, ta posible pero solamente si e ta “manos libres”, esta handsfree.  Sea via un Car-Stereo cu tin Bluetooth of wayanan cu ta bay pa e radio, y e sonido sali via speakernan di auto.

Spaña ta prohibi uso di headset of earphone di waya of Bluetooth pa asina haci combersacion handsfree.  E mester bay via speakernan di auto.  Si acaso nan garabo, e multa por yega te 400 euro (809 Florin).

Ta absolutamente prohibi pa lesa message, of skirbi mensahe via Whatsapp, Twitter, Instagram, Facebook, Messenger ora bo ta manehando.  Pa colmo den caso di Whatsapp, Spaña ta prohibi pa bo sea scucha un voicenote, of hasta manda un voicenote mientras bo ta tras di stuur.  Pa esaki tambe tin multa halto stipula.

Tin hopi mas reglamento, e.o. cu bo no mag di sona e pito di e auto sin cu tin motibo pa esey.  Multa por yega na 80 euro (161 Florin).  Si bo faya y no pone luz di señal na un birada, bo por haya multa di 200 euro (403 Florin).

Fuera di esey, Polis di Spaña por dunabo boet di 80 euro (161 Florin) si e chauffeur y pasahero ta core y pleita den auto, of tambe si acaso bo ta coriendo mientras bo ta sunchi otro hende sinta banda di bo.

- Advertisement -

DUNA COMENTARIO

Please enter your comment!
Please enter your name here