Home Cultura Spectacular clausura di Aruba Symphony Festival

Spectacular clausura di Aruba Symphony Festival

20
0
SHARE
- Advertisement -

ORANJESTAD (AAN)—Diasabra anochi a tuma lugar e grandioso clausura di e di cinco edicion di “Aruba

Symphony Festival”, den Cas di Cultura.

Masha poco a falta pa mira un sala completamente yen. Un publico evidentemente entusiasma a lanta para aplaudi cada presentacion di e Orquesta Sinfonico cu a wordo crea pa e oportunidad aki, cu mas di 80 participante forma, den su mayoria, pa hobennan musico hopi talento di mas di 15 pais rondo mundo, incluyendo Aruba. Un orguyo realmente cu merece di e sosten di henter nos pueblo.

Por a mira e director artistico Simon Gollo entrega su mes na un manera hopi apasiona cu a yega na e curazon di e presentenan causando hopi emocion. Un hoben berdaderamente extraordinario! Ki honor pa Aruba cu el a trece Aruba Symphony Festival & Academy na Aruba, y cu hopi di nos hobennan di scol a haya e oportunidad di ser conoci cu un orquesta, y uno di tal magnitud.

Durante e prome parti e gran Francisco (Pacho) Flores a impresiona e publico cu e instrumento musical poco conoci pero hopi antiguo “corno” y sin duda cu su trompet. El a interpreta varios pieza clasico cu Trompet cu a pone e publico lanta para aplaudi e calurosamente. El a toca un pieza hopi importante pe cu el a compone pa su mama: “Morocota” cu ta un moneda antigua di 20 dollar mericano. Brevemente el a conta di esaki.

Den e di dos parti, a interpreta e di Siete Sinfonia di Beethoven, den A Mayor, cu a cautiva e publico na un forma impresionante.

E ultimo interpretacion a conta cu e direccion di un virtuoso di fama internacional, cu ta fundador y director di nada menos cu e Orquesta Sinfonico di Boston, ken a hiba palabra destacando e figura di Simon Gollo, y tambe e hobennan musico di gran calibre di cual e orquesta a consisti.

Simplemente un honor pa Aruba cu durante cinco aña consecutivo ta sede di e “Aruba Symphony Festival & Academy” formando tambe nos talentonan hoben den musica clasico.

Ta bon pa menciona cu a conta cu presencia di e Gobernador Interino, sra. Lacle y Minister Rudy Lampe, titular di Enseñanza, Ciencia y Desaroyo Sostenible.

 

Potretnan cortesia di Aruba Symphony Festival

 

- Advertisement -

DUNA COMENTARIO

Please enter your comment!
Please enter your name here