Home Editorial Sue-Ann Ras ta confirma e moral autentico di Aruba

Sue-Ann Ras ta confirma e moral autentico di Aruba

195
0
SHARE
- Advertisement -

Editorial

Den un tempo cu Aruba ta boga pa rescate di su balornan cu a bay perdi den mundo politico, e persona di Sue-Ann Ras ta bin dilanti. Un politico hoben y prometedor di Aruba, cu na inicio di siman ta duna aliento nobo na nos pais.

Sue-Ann Ras a bandona mundo politico di Aruba, caminda el a wordo ataca na un forma barbaro pa motibo cu durante un reunion den Senado Hulandes, un persona a logra capta e pantaya di su computer.

E motibo grandi cu tur atencion na Aruba tabata dirigi riba e reunion politico di Reino na Hulanda, a wordo pusha un banda y tur atencion a wordo dirigi riba e hecho cu Sue-Ann Ras tabata sigui un pelicula riba su computer.

Oponentenan politico no a tarda pa crea un ambiente total sin bisa ningun momento pakico nan bista no tabata dirigi riba loke tabata pasa den sala y no riba computer di Sue-Ann Ras.

Den un situacion politico caotico na Aruba cu politica a crea cu atraccion di un proyecto refineria cu a hinca Aruba den un desaster economico y aventura mundial, acopla na un debe nacional cu politiconan amigo a permiti e gobierno anterior crea,  contrincantenan politico a haya algo pa ataca e miembro di Parlamento cu no a contesta nan.

Ayera, e miembro di Parlamento pa MEP, Sue-Ann Ras a bini dilanti y nos mester lanta para pa brinda homenahe na e forma cu el a reacciona. El a tuma despedida di Parlamento cu palabranan cu solamente un persona cu alma Arubano por expresa.

El a comete un eror. Si! El a pidi dispensa. El a tene su mes na dignidad y honor, cu ta palabranan grandi den e vocabulario di Aruba y di gran importancia pa e Arubiano di alma y no solamente di oportunidad cu Aruba ta entrega hende.

Den Sue-Ann Ras awe nos kier mira e hoben Arubiano, cu su pakete di principio cu ta duna muestra cu nos balornan. Awe Sue-Ann Ras a duna prueba cu e herment mas importante pa habri caminda pa futuro na Aruba, ta keda mantene pa asina por tuma pasonan a base di principio y no oportunismo cu a hinca Aruba den e crisis actual.

Na momento cu Sue-Ann Ras entrega su retiro na su partido, e ta bandona arena politico. Awe nos kier pidi Sue-Ann pa hamas entrega e curashi, e balornan, e principio cu el a demostra na e momentonan aki pero pa sigui uza nan den su carera cu lo sigui y lo conduci su persona na exito riba otro tereno.

Den nos sistema democratico, politica ta un di e formanan di sirbishi na nos pais. Sue-Ann Ras tin e capacidad mas importante pa sirbi nos dushi Aruba, cu ta e integridad cu el a demostra di no bay drenta discusion cu su adversarionan politico pero pa tuma e decision cu lo nifica despedida di e mundo politico, cu mester di su ehempel si nos kier pa Aruba prospera.

Nos no ta despedi di Sue-Ann Ras. Nos kier pidi su persona, pa inspira hobennan. Pa entrega e balornan di Aruba na hopi hoben confundi dor di inspiracion robes den e arena politico, caminda puesto politico y su beneficionan personal a bira e asunto mas importante pa hopi.

Un aplauso pa Sue-Ann Ras y forsa pa su persona y famia, cu awe merece di subi e bandera di Aruba cu orguyo na e cuna di un hoben, cu por hisa su cara na laira ora e canta himno di nos dushi Aruba.

Futuro ta warda Sue-Ann Ras. Animo!

 

 

- Advertisement -

DUNA COMENTARIO

Please enter your comment!
Please enter your name here