Home Hudicial Ta apela sentencia di muher Zachary Quandt cu a haya 10 aña...

Ta apela sentencia di muher Zachary Quandt cu a haya 10 aña pa a tira Sky mata

1633
0
SHARE
- Advertisement -

Fiscal a anuncia den Corte

ORANJESTAD (AAN): Tur hende den sala di Corte a keda sorprendi pa e anuncio di Fiscal durante tratamento di e caso penal contra e hoben R.N. (19), cu Ministerio Publico ta apela e sentencia contra e muher Zachary Quandt (20).

Ta asina cu Fiscal a exigi 18 aña di prison y Hues di Corte den Promer Instancia a condena Z.Q. na 10 aña di prison. Fiscal a bisa den Corte, cu e no ta di acuerdo cu Z.Q. a haya 10 aña so di prison. El a bisa cu ta Z.Q. ta esun cu a tira Hubert Arrindell (Sky) mata.

Fiscal a exigi 14 aña di prison pa R.N. pasobra e ta haya cu R.N. ta complice mescos cu e otronan den e auto. R.N. tabata esun cu tabata core e auto.

Na April 2019, Hues di Corte den Promer Instancia a dicta sentencia den e caso di asesinato di Sky, pa e 4 sospechosonan. E homber J.W., acusa di ta complice di asesinato Sky y complice di intento di asesinato di tres otro persona, posecion di arma di candela, Hues ta haya cu no por prueba cu J.W. ta complice.

Hues a bisa cu e hecho cu J.W. tabata presente den auto, y cu K., a worde tira promer y a bay cu nan no ta haci’e complice. No tin indicacion cu J.W. tabata sa di e plan di bay tira. Ademas muher Z.Q. a bisa cu J.W. tabata sinta dilanti y no tabata envolvi den papiamento pa tira of no. Hues ta haya cu no tin relacion cu ta mustra cu J.W. lo ta envolvi. Hues a declara J.W. liber y a rechaza peticion di Fiscal pa J.W. su detencion.

E muher Z.Q. a admiti di a tira. Pesey Hues ta hay’e complice di asesinato, intento di asesinato y posecion di arma di candela. Hues a mustra cu Z.Q. a kita Sky su bida. A causa daño irreparable pa e famia. A tira riba caminda publico y causa inseguridad. Hues a tene na cuenta cu Z.Q. ta “first offender” y cu e ta jong y a coopera cu investigacion y a lamenta loke el a haci. Hues a conden’e na 10 aña di prison.

E muher K. y e homber B., Hues a haya nan complice di asesinato y intento di asesinato y tambe posecion di arma. Hues a mustra cu for di declaracion di Z.Q. y J.W. por compronde cu tabatin 3 persona den auto patras y Z.Q. a puntra si mester tira diferente biaha y nan a bisa tira diferente biaha. B. a pasa Z.Q. e arma y a instiga Z.Q. pa tira. Hues ta haya cu esaki ta complice. E causa di morto di Sky ta door di e tiramento. Tur dos tabata menor di edad y a aplica ley hubenil.

A base di raport di psycologo y Reclasering, Hues ta haya cu ademas di castigo hubenil por tuma medida pa interna den instituto. Pa B. no tin esaki y pesey no por ordena interna den instituto. Pesey Hues a condena B. na castigo combina mirando su edad y pa bay bou guia di Reclasering y evita cu lo ripiti. Hues a condena B. na 4 aña di prison di cual 1 aña ta condicional y bao guia di Reclasering.

Pa loke ta e muher K., expertonan ta conseha cu e mester bay den un instituto pa drecha su comportacion. Hues ta tuma over e consehonan y pa interes di seguridad di comunidad a ordena pa K. bay obligatorio interna den un institucion pa 2 aña.

Awor cu Fiscal a anuncia cu ta apela e sentencia di e muher Z.Q., posiblemente e aña aki ainda e tratamento lo tuma lugar.

- Advertisement -

DUNA COMENTARIO

Please enter your comment!
Please enter your name here