Home Parlamento Un Fondo di Caretera y Infrastructura ta di vital importancia pa desaroyo...

Un Fondo di Caretera y Infrastructura ta di vital importancia pa desaroyo di Aruba

18
0
SHARE
- Advertisement -

Lider di Fraccion di POR Marisol Lopez-Tromp:

ORANESTAD (AAN) — Lider di Fraccion di POR, Parlamentario drs. Marisol Lopez-Tromp, na inicio di e luna aki a manda un carta pa ministernan Otmar Oduber y Xiomara Ruiz- Maduro cu un serie di pregunta relaciona cu fondonan pa caretera y infrastructura.

Den e carta aki e ta haci un serie di pregunta relaciona cu e dos areanan importante aki pa desaroyo di nos isla y ta indica cu lo ta di vital importancia pa bin cu un “Wegen en Infrastructuur Fonds” (WIF), manera a conoce den pasado na momento cu Lopez-Tromp tabata minister di Infrastructura. Pa medio di e fondo aki a logra traha hopi caminda cada aña y cu lamentablemente a wordo para durante Gabinetenan Eman.

Consecuencia di esaki ta cu no tabata tin un forma structura y eficiente pa por dedica na e inversion di mantencion, renovacion y construccion di careteranan y su infrastructura. Lamentablemente hopi caretera a bay atras y nunca a dedica e fondonan necesario pa evita esaki.

Cu un Fondo di Caretera, WIF, Pais Aruba por conta cu fondonan aproba y predetermina cu ta wordo dedica specificamente pa caretera y infrastructura. Logrando esaki e instancianan concerni por traha na un forma structural y segun un schedule riba e mantencion, renovacion y construccion di careteranan y nan infrastructura segun e necesidadnan di cada area.

Manera Lopez-Tromp ta bisa, e desaroyo di e parti aki ta hopi importante y ta forma parti integral di un desaroyo economico. “Un desaroyo economico sin cu e bay pareu cu un desaroyo di nos careteranan y nos infrastructura no lo ta esun di mas optimal y lo por wordo afecta hopi lihe.

Ademas, Gabinete Wever-Croes su meta principal ta pa pone nos hendenan central y parti di dje tambe ta nos careteranan y infrastructura, ya cu e ta contribui hopi na mehora y eleva e calidad di bida di nos hendenan, sin laga afo e parti di salud, siguridad y nos medio ambiente”.

Teniendo na cuenta e puntonan aki, lider di Fraccion di POR, ta pidi Gobierno pa reinstitui e WIF logrando asina un suma fiho pa e inversionnan necesario wordo realiza.

Marisol Lopez-Tromp, finalizando, a recorda e ministernan Oduber y Maduro cu e ta en espera di e contestanan por escrito di e serie di preguntanan manda pa nan. relaciona cu e temanan di caretera y infrastructura.

 

- Advertisement -

DUNA COMENTARIO

Please enter your comment!
Please enter your name here