Segun raport di CAA
ORANJESTAD (AAN): Tin un raport di CAA cu ta e consultorio pa asuntonan di adiccion na San Nicolas y relaciona cu esaki Arthur Comenencia a duna di conoce cu esaki a cuminza como un proyecto di scolnan pa medio di un contract di SKOA.
Ta asina cu pa medio di e proyecto aki a papia cu diferente scol secundario ofreciendo e servicio na comunidad y asina bin un contract cu e mayor ta aproba pa test e muchanan pa droga.
Di e forma aki a yega na cifranan. Por a mira cu den scolnan, 45% di SPO di San Nicolas a bay cerca nan. Mirando e cambionan di aña a wak cu e cifranan den e parti di marihuana a subi drasticamente.
Comenencia a sigui bisa cu e problematica aki tey for di hopi tempo caba, pero cerca e hobennan esaki a cuminza crece. Den e ‘drug test’ por a mira cu e cifranan a subi y ta alarmante.
Diferente biaha a papia ariba esaki. Cambionan ta na caminda, a indica, ya cu ta bay teamnan ta bay subi caminda. Conhuntamente cu FADA a traha un ‘joint venture’ den e parti preventivo.
Pero un bes cu cay den e fase di adiccion, CAA ta tuma over e parti di guia pa un 12 siman, unda scol ta exigi pa e hobennan ta haya tratamento. Den e tratamento aki ta busca e raiz di e problema y mayoria di esaki ta pa motibo di problemanan social, bullying, etc.
Arthur Comenencia a indica cu a base di esey ta trata e muchanan y hopi di nan ta bira conciente di e problematica cu marihuana ta trece cune. Mayoria ta supera esaki cu exito y hopi hoben ta conciente di e problema y e consecuencia di uza marihuana.
Hopi ‘drug test’ ta tuma lugar den un manera ‘random’. CAA ta traha cu diferente compania cu ta acerca nan pa duna e persona un chens tambe. Ta ripara cu hopi biaha e hobennan ta bezig ta experimenta cu THC y e ora ta bin dilanti e casonan di alucinacion y psicosis.
A remarca cu nan ta constata cu pa añanan e cifranan ta subiendo entre e hobennan. Ora di bay haci ‘drug test’ na scol e ta haci un efecto. Ultimo biaha a laga haci test ariba un grupo di 15 persona y 3 so tabata positivo.
Esey ta duna un señal cu e mensahe a cuminza yega eyfo, pero mester mas informacion y mas guia, a agrega.
