Home Gobierno Warda Nos Costa lo wordo incorpora den un dienst completamente nobo y...

Warda Nos Costa lo wordo incorpora den un dienst completamente nobo y lo amplia facilidadnan

133
0
SHARE
- Advertisement -

Cu fondonan aporta pa Hulanda:

ORANJESTAD (AAN) – Minister di Husticia, mr. Andin Bikker, a duna di conoce den conferencia di prensa di gobierno, Dialuna, cu ta bay aplica riba diferente tereno, e fondonan cu Hulanda a pone disponible pa reforza nos fronteranan.

Un di e areanan unda lo ubica fondo ta e ampliacion di e edificionan actual di Warda Nos Costa, banda di Aeropuerto y na Dakota, locual ta bay acapara un inversion di mas of menos dos miyon florin.

E dignatario a indica cu Hulanda ta habri y ta positivo pa esaki, y gobierno ta wardando confirmacion.

“Mi ta kere ta importante pa nos haya ampliacion di e instancia aki pasobra e capacidad di detencion, debi na e situacion hopi preocupante na nos pais ruman Venezuela, cada bez ta pone nos dilanti retonan”, Minister mr. Andin Bikker a declara.

E mandatario a resumi e metanan cu a logra cu e fondonan disponible den menos di un aña di tempo, na WNC, den cuadro di e situacion alarmante cu tin aworaki na Venezuela.

Pa cuminza, e dignatario a splica, a logra uniform nobo pa tur empleado, mescos cu material di trabao nobo. A busca aparatonan pa scan pa amplia nan facilidadnan y nan tin machine pa copia moderno, pasobra esun cu nan tabata tin, ora e minister a asumi su funcion, tabata laga di desea.

Tambe a renova e “huis en beware” na Dakota pa aworaki tin capacidad adicional, y e minister ta bezig incorporando Warda Nos Costa den un dienst completamente nobo. Aworaki e ta cay bao di KPA. WNC ta hayando autonan nobo.

“Nos a manda Sra. Hassel y Sr. Wernet na Hulanda pa nan por haya training den e aplicacion di Schiphol Model, y entre tanto nos a cambia e Ley di LTU, 1 di December 2018, pues reciente y 3 di Juli cu a pasa a bin na vigor e Schiphol Model”, Minister Bikker a relata.

E dignatario a comenta cu tin biaha tin frustracion pasobra tin hende ta wordo gara trahando, cu a yega Aruba como turista y ta surpasa nan estadia, y ora WNC ta eherce control ta ripara cu entre 2015, pa 2017 nan ta na Aruba y diripiente nan ta haci aplicacion pa asilo.

E mandatario a reitera cu nan a ampara bao e articulo 19 di e ley prome cu 3 di Juli reciente. Aworaki cu e ley a wordo cambia nan no por permanece na Aruba mas bao argumento di asilo.

E articulo 19, Minister Bikker a bolbe splica, casi tabata invita hendenan pa aplica pa asilo politico, y ta hopi frustrante ora nan haya un persona cu a bin na 2015-2016 of 2017 como turista, y a permanece riba e isla ilegalmente y diripiente e ta wordo deteni pasobra autoridad ta haye ta trahando. E ta bay na bewaring y e ta haci uso indebido di e articulo 19 bieu, cu a wordo cambia na Juli aki.

“Aworaki cu Dios mediante nos haya cooperacion y aprobacion di Hulanda, un ampliacion substancial ta bay tuma lugar na e facilidadnan existente na Aeropuerto, y tambe na esun di Dakota, pa nan ta up to date den cuadro di e retonan sin precedente cu Aruba ta enfrentando door di e situacion na Venezuela” Minister di Husticia a señala.

 

- Advertisement -

DUNA COMENTARIO

Please enter your comment!
Please enter your name here