Home Hudicial 1 aña y 8 luna di prison exigi pa Canades gara cu...

1 aña y 8 luna di prison exigi pa Canades gara cu 35 kilo di marihuana na aeropuerto

111
0
SHARE
- Advertisement -

Abogado ta haya cu dos di e tres maletanan no ta di e sospechoso

ORANJESTAD  (AAN): E homber Canades D.L.B., ayera mainta den Corte di Husticia ta para riba cu e sa solamente di e maleta cu e tabata carga y no sa nada di e otro dos maletanan riba belt di maleta cu tambe tabata carga di marihuana. Fiscal ta haya cu tur e droganan ta mesun cos drecha den maleta pues tur ta di D.L.B. El a exigi 1 aña y 8 luna di prison. Abogado mr. Illes a bisa Hues cu e dos maletanan cu a haya riba belt su cliente no tin nada di haci cu esakinan. El a pidi pa castiga D.L.B. na mesun tempo cu e ta sera caba den KIA. Hues a bisa cu e ta bay studia e caso y otro luna lo por spera sentencia.

LOTE DI MARIHUANA

Hues a mustra cu dia 3 Februari 2019 mas o menos 4’or di atardi, miembronan di Douane a mira D.L.B., cu a caba di yega Aruba, a nenga di pasa su maletanan den scan . El a bisa cu e maleta grandi no ta di dje y cu e falta un maleta color biña. E miembronan di Douane a bay cu D.L.B. na e belt y a mira un maleta biña. A puntr’e si esey ta su maleta. E tabata duda pa contesta. E ora ey miembronan di Douane a bis’e pa habri e maleta grandi. El a habri esaki y bolbe ser’e. El a bisa cu e dos maletanan grandi preto ta di conocirnan y no ta di dje. E no kier a bisa si e maleta biña ta di dje. A habri e maleta di D.L.B. y a haya cantidad di pakinan di droga. Den e otro dos maletanan tabatin cantidad di pakinan mesun cos. Investigacion “field test” a mustra cu e pakinan tabata marihuana.

E ora ey e miembronan di Douane a detene D.L.B. y e maletanan a keda confisca y duna na miembronan di narcotica. A confisca tambe dos cellular y un cantidad di dollars. En total 69 paki di marihuana tabatin den e tres maletanan y a pisa mas o menos 35 kilo di marihuana.

SOSPECHOSO KIER PAPIA E BERDAD

Hues a cuminsa lesa e declaracion di D.L.B. haci na agentenan di narcotica.  D.L.B. a bisa Hues cu loke el a declara no ta e berdad. El a bisa Hues cu e kier bisa e berdad. El a bisa Hues cu el a bin Aruba cu un maleta grandi y un maleta di man. Ambos ta color preto. Na Canada nan a bis’e pa hiba e maleta cu marihuana. Un tal Rally a dun’e e maleta. E no tabata sa nada di e otro dos maletanan. Segun D.L.B., na Aruba e no kier a pasa den e scanner y pesey a bisa cu e no a haya su maleta color biña. E ta para riba cu e no tabata sa nada di e dos maletanan cu tabatin riba belt. El a bisa cu riba su ticket por confirma cu e tabatin dos maleta so. El a bin Aruba cu un amiga y e amiga aki a bin cu su mihor amiga. El a bisa cu nan no tin nada di haci cu e cargamento di droga. Ta asina cu e dos damanan a bay liber.

Segun D.L.B., e tabata den necesidad di placa y nan a introduci’e na e homber Rally. El a bisa cu e no sa nomber completo y tampoco no tin number di cellular di Rally. El a bisa cu su amiga mes tin 8 luna na estado. El a bisa cu e kier coopera pa asina e bay bek Canada.

Fiscal a remarca cu e otro dos amiganan tambe lo tabatin droga. Segun D.L.B., e no sa nada di e otronan y e ta para pa loke e tabatin cun’e den e maleta.

TRECE DROGA PA PLACA

Hues a bisa cu riba cellularnan di D.L.B. a haya mensahenan cu ta duna impresion cu e tabata traha pa Rally. Segun D.L.B. e ta un hungador di basketball y Juli 2019 e tabata pa bay hunga professional. Tambe el a bisa cu e tabata bayendo Universidad na Canada y tabata falta un trimester so pa e caba. El a bisa Hues cu el a bin cu solamente 1 maleta cu marihuana. Ariba pregunta di Fiscal, el a bisa cu Rally a ofrece 3 mil florin pa trece e droga.

Hues a bisa cu for di cellularnan por compronde cu el a haya oferta pa transporta 1 kilo pero e no a acepta esaki. Despues el a acepta e otro oferta di Rally. Hues a mustra cu Rally a bisa D.L.B. cu e lo bay cu dos dama y cu nan lo no papia nada.

Hues a bisa cu e dama O. a declara cu e dama S., un bon amiga di dje, a invit’e pa bay cun’e cu D.L.B. El a bisa cu el a duna S. placa pa cumpra e ticket. El a viaha cu un maleta di man. S. a bisa cu e tin relacion cu D.L.B. desde 2018 y cu D.L.B. a paga pa nan ticket.

TUR PAKI DI DROGA MESUN COS

Hues a bisa cu for di investigacion ta sali na cla cu tur e pakinan ta mesun cos. Ta sospecha cu tur e cargamento di droga ta di e mesun traficacion o sea di D.L.B. Fiscal a bisa cu D.L.B. tabata riba snap chat un rato. Segun D.L.B., el a informa Rally cu autoridad na Aruba a gar’e pa e no pensa cu D.L.B. lo a horta e droga.

Hues a bisa cu for di camera a mira D.L.B. y e otro damanan tabata mishi cu e maleta biña. Tabata sospecha cu e lo a kita e label cu lo tabata riba e maleta. Segun D.L.B. e tabata mira e maletanan riba nan label. Hues a remarca pakico e tabata mira e maleta biña siendo cu e tabatin maleta preto. Fiscal a bisa cu a haya un label cu nomber di D.L.B. y un otro nomber Reed. Hues a bisa cu no tin claridad unda a haya e labelnan aki.

EXIGENCIA DI FISCAL

Fiscal a bisa cu a haya D.L.B. cu un maleta mientras cu riba belt a haya dos otro. A mira riba camera cu e tabata mishi cu e otro dos maletanan. D.L.B. a bisa cu e la haya e maleta di Rally y cu e no sa di e otro maletanan. Fiscal ta haya cu D.L.B. tabata sa di e tres maletanan. El a mustra cu riba e mesun vuelo a haya e tres maletanan y tur tabatin e mesun tipo di pakinan. Riba cellular tabatin mensahe pa e transporta droga pa Aruba. E ta haya cu D.L.B. y e otro dos damanan ta envolvi den e importacion di e 35 kilo di marihuana. Fiscal ta haya cu D.L.B. a purba importa un cantidad grandi di marihuana. Tin hopi problema den Caribe cu traficacion di droga. Na opinion di Fiscal, D.L.B. tabata sa cu tabatin droga den e maletanan. El a exigi 20 luna di prison. Tambe pa destrui e lote di marihuana. E placanan lo keda confisca.

ABOGADO

Mr. Illes a bisa Hues cu e pregunta ta si D.L.B. ta responsabel pa e total 35 kilo di marihuana. E abogado ta haya cu no ta asina. E ta haya cu D.L.B. tabata un mula y tabatin un maleta di man y un maleta grandi. E maleta tabatin mas o menos 10 kilo di marihuana. E abogado a señala cu un di e labelnan tabata riba nomber Reed. Den avion tabatin un pareha Reed pero no a persigui e persona aki. Por bien ta cu e otro dos maletanan tabata di Reed. D.L.B. tabata mishi cu maletanan pero no por prueba cu el a check in e maletanan aki na Canada. Na opinion di e abogado, no tin ningun prueba cu e maletanan ta di D.L.B. E hecho cu el a menciona color biña no ta mustra cu e maleta biña ta di dje. Segun e abogado, por ta posibel cu Rally lo a manda otro personanan cu maleta cu droga. Sa sosode mas biaha cu traficantenan ta usa mas mula pa transporta droga. El a bisa Hues tambe cu for camera no por bisa cu D.L.B. a kita e label di e maletanan. E abogado ta kere cu mester castiga D.L.B. pa solamente e mas o menos 10 kilo cu e tabatin den su maleta. E ta haya cu D.L.B. a papia e berdad dilanti Hues. Mr. Illes ta haya e exigencia di Fiscal ta mucho halto. E ta haya un castigo cu D.L.B. a sinta caba den KIA ta suficiente.

Hues a sera tratamento di e caso y a bisa cu e ta bay studia e caso. Hues a palabra cu 13 September 2019 pa 8.15 lo tin sentencia.

- Advertisement -

DUNA COMENTARIO

Please enter your comment!
Please enter your name here