Home Hudicial 8 aña di prison exigi pa duo cu a tira y herida...

8 aña di prison exigi pa duo cu a tira y herida hoben den lomba

201
0
SHARE
- Advertisement -

Ambos sospechoso ta bisa cu no ta nan

ORANJESTAD (AAN) – E homber Arubiano C.M.(20) y e Colombiano biba na Aruba L.F.M.(23) ayera mainta a scucha Fiscal exigi 8 aña di prison pa cada un. Fiscal ta haya nan culpable di a purba mata intencional e homber R.C. riba 21 September 2018. Tur dos sospechoso ta bisa cu no ta nan. Den e articulo aki, DIARIO ta publica e tratamento di e caso y exigencia di Fiscal. Den un otro articulo ta publica e defensa di e dos abogadonan.

ACUSACIONNAN

Ayera mainta Fiscal a bisa Hues cu e ta acusa C.M. y L.F.M. cu riba 21 di September 2018 intencional a tira e homber R.C. y herid’e den su lomba. Tambe Fiscal ta acusa nan di tabatin arma di candela y bala cayente. Fiscal a acusa C.M. tambe cu riba 24 September 2018 e tabatin un cantidad di marihuana y cocaina cun’e.

Na Mei 2019 e caso a bin dilanti pro forma. E momento ey e victima R.C. tabata presente y el a duna Hues su demanda di daño cu ta 25 mil florin. Ayera, e victima no a presenta.

SET UP DI POLIS?

Abogado mr. Carlo a bisa Hues cu a base di e resultado DNA for di Hulanda, el a bay papia cu C.M. y cu C.M. ta bisa cu tur e asunto aki ta un set up di Polis. Por a mira cu C.M. a bin den Corte cu un pechi hinca den un saco di plastic y el a bisa Hues cu Polis ta bisa cos robez. E pechi cu Polis a haya riba dak di un cas na Tanki Leendert, no ta di dje sino esun cu e tin den su man, ta su pechi. Segun C.M., e tabatin e pechi bisti den supermercado Chines. Hues a remarca cu esey no tin nada di haci cu e caso. Ta e tiramento cu a sosode despues, ta loke ta sospecha C.M. di dje. Tanto C.M. como L.F.M. ta desmenti di a tira R.C.. Pa loke ta e droga, C.M. a bisa cu e droga ta pa su propio uso.

INTENTO ASESINATO

Hues a bisa cu 21 September 2018 anochi na Shiribana lo tabatin tiramento. E victima ta e homber R.C., kende a sufri dos tiro den su lomba ora el a core bay. Ta asina cu tur dos sospechoso ta bisa di no conoce R.C. Hues a bisa cu R.C. si ta bisa cu e conoce nan. Segun declaracion di R.C. na Recherche, e tabata serca un amigo y cu el a mira C.M. y L.F.M. riba un scooter blanco sin helm bisti. El a reconoce nan. Nan a bay na e veranda caminda R.C. tabata y C.M. a pidi L.F.M. pase e arma. R.C. a core y a scucha un bala pasa y dos otro tiro a herid’e den lomba. Segun R.C., despues cu el a cay abao, C.M. y L.F.M. a core bay.

POLIS A LOS TIRO

Polis na caminda pa e incidente a mira e scooter y a duna señal pa para pero no a haci caso. A cuminsa un persecusion y na dado momento nan a yega den un caya sin salida. Polis a ordena nan pa drumi  C.M. y L.F.M. a core na pia. E ora ey Polis a los un tiro di advertencia. A reconoce L.F.M. y a mira C.M. core riba dak.

DNA A SALI POSITIVO

A haya un pechi riba un dak cu ta parce hopi esun cu C.M. di e scooter tabatin bisti. A laga haci DNA y a resulta cu tin DNA di C.M. y otro dos persona riba e pechi. Segun C.M. e pechi ey no ta di dje. El a bisa cu e no sa nada di e caso aki. El a bisa cu ta Polis a pone e pechi riba dak.

Hues a bisa cu un testigo a reconoce C.M. riba potret. Segun C.M. el a tende cu e testigo ta un choller y por ta Polis a duna e testigo algo pa e declara contra dje.

SCUCHA COMBERSACION

Hues a mustra cu a scucha combersacion di C.M. via cellular. C.M. a bisa Hues cu esey no por ta posibel pasobra e no tin cellular y cu e no a papia. Polis a bisa cu ta reconoce C.M. su stem den e yamada via cellular. Segun Polis, C.M. a bisa cu e lo bay tira e homber A.K. cu lo a bisa di a fia C.M. su scooter. Den Corte C.M. a bisa Hues cu e no conoce A.K. Polis a sigui scucha cu C.M. a bisa con el a sconde riba dak y despues a bay keda na cas na un amiga y cu e tabatin un arma. El a bisa cu el a kere cu el a mata e victima. El a bisa di a tira e victima den lomba. El a bisa cu e intension tabata pa tira R.C. y un otro mata y ningun hende lo tabata sa.

Hues a bisa cu e victima a sufri dos tiro den lomba. El a bay e mesun anochi hospital caminda a saca e balanan. E balanan ta bin di e mesun arma. Door di e tironan, a afecta R.C. su pulmon y higra. E no por haci hopi movecion pasobra e ta cansa liher. El a demanda 25 mil florin di daño inmaterial.

Hues a mustra cu segun e carchi di castigo, C.M. a haya castigo di prison den pasado pa menaza cu arma. L.F.M. tambe a haya castigo di prison den pasado pa intento di atraco cu violencia.

EXIGENCIA DI FISCAL

Fiscal a bisa cu e ta haya legalmente proba cu C.M. y L.F.M. kier a tira mata R.C. El a bisa Hues cu investigacion a mustra cu R.C. tabata na cas di su amigo d.M. y el a mira e scooter yega y C.M. a pidi L.F.M. pas’e e arma. R.C. a sufri dos tiro den lomba cu a afect’e. Fiscal a bisa cu dos biaha R.C. mester a opera. E ta haya un milagro cu R.C. a keda bibo. Segun Fiscal, Polis a topa C.M. y L.F.M. y a duna nan orden pa para. C.M. a sigui core bay den un caya sin salida. Nan a benta e scooter abao y core bay. A haya un pechi riba dak. A manda e pechi Hulanda pa laga haci DNA. A constata cu a haya DNA di C.M. y otro dos persona riba pechi.

Fiscal a mustra cu Polis a reconoce stem di C.M. riba cellular caminda e ta papia tocante e tiramento y cu el a kere cu a mata R.C. Fiscal a bisa cu R.C. a declara cu un siman promer nan a purba dale mata cu auto. Fiscal a bisa cu e ta haya cu C.M. conoce R.C. bon bon y no manera C.M. ta pretende. El a mustra cu C.M. mes a declara cu e y R.C. ta bende droga. Fiscal a bisa cu e ta tene cuenta cu actitud di e sospechosonan cu no kier tuma responsabilidad pa loke nan a haci. Fiscal a exigi 8 aña di prison pa ambos.

 

- Advertisement -

DUNA COMENTARIO

Please enter your comment!
Please enter your name here